സൂറത്തുന്നജ്മ്

بسم الله الرحمن الرحيم

റഹ് മാനും റഹീമുമായ അള്ളാഹുവിന്റെ എല്ലാ നാമങ്ങളും പറഞ്ഞ് അനുഗ്രഹം തേടി ഞാൻ ആരംഭിക്കുന്നു

1.    وَالنَّجْمِ إِذَا هَوَى

(1) നക്ഷത്രം തന്നെയാണ് സത്യം അത് അസ്തമിക്കുമ്പോൾ

അള്ളാഹു ഒരു വസ്തുവിനെക്കൊണ്ട് സത്യം ചെയ്യുമ്പോൾ അതിൽ പല രഹസ്യങ്ങളും ഖുർആൻ മുന്നോട്ട് വെക്കുന്ന തത്വങ്ങളെ സ്ഥിരീകരിക്കുന്ന പല ദൃഷ്ടാന്തങ്ങളും അടങ്ങിയിരിക്കും. ഉപരി ലോകത്ത് കണക്കറ്റ നക്ഷത്രങ്ങൾ സ്ഥിതി ചെയ്യുന്നുണ്ട്.അവയെല്ലാം അള്ളാഹുവിന്റെ അതി സൂക്ഷമമായ നിരീക്ഷണത്തിന്റെയും അതി ശക്തിയുടെയും തെളിവുകളുമാണ്.നക്ഷത്രം ആകാശത്തിന്റെ മദ്ധ്യത്തിലാവുമ്പോൾ നാലു ദിക്കുകൾ മനസിലാക്കാൻ പ്രയാസമുണ്ട്. എന്നാൽ അത് അസ്തമിക്കാനായി പടിഞ്ഞാറൻ ചക്രവാളത്തിലേക്ക് താഴ്ന്നു കൊണ്ടിരിക്കുമ്പോൾ  നാലു ദിക്കുകളും മനസിലാക്കാൻ പ്രയാസമില്ല.അത് മേല്പോട്ട് ഉയരുമ്പോഴും വേഗത്തിൽ ദിക്കുകൾ കണ്ട് പിടിക്കാൻ സാധിക്കും. മരുഭൂമികളിലും സമുദ്രങ്ങളിലും യാത്ര ചെയ്യുന്നവർക്ക് നക്ഷത്രങ്ങളായിരുന്നു പ്രധാന മാർഗദർശകം. നക്ഷത്രം  കൊണ്ട് അവർ ലക്ഷ്യത്തിലെത്തിച്ചേരുന്നു എന്ന് ഖുർആൻ തന്നെ പറഞ്ഞിട്ടുണ്ട്(16/16)

നക്ഷത്രം  എന്നത് ഒരു വർഗ്ഗത്തെ സൂചിപ്പിക്കുന്നു എന്നാണ് ധാരാളം വ്യാഖ്യാതാക്കൾ പറയുന്നത്. കാർത്തിക നക്ഷത്രം ആണ് ഉദ്ദേശമെന്ന് പറഞ്ഞവരുമുണ്ട്

 2. مَا ضَلَّ صَاحِبُكُمْ وَمَا غَوَى

(2) നിങ്ങളുടെ കൂട്ടുകാരൻ(നബി (സ)) അറിയാതെ വഴിതെറ്റിയിട്ടില്ല .മന:പൂർവ്വം സത്യ മാർഗ്ഗത്തിൽ നിന്ന് വ്യതിചലിച്ചിട്ടുമില്ല

നക്ഷത്രങ്ങളെ കൊണ്ട് സത്യം ചെയ്ത് അള്ളാഹു പറയുന്നത് വളരെ പ്രധാനപ്പെട്ട ഒരു വിഷയമാണ്.അതായത് നബി(സ) അബദ്ധമായോ, അറിഞ്ഞു കൊണ്ടോ ഒരു ദുർമാർഗത്തിലും പെട്ടു പോയിട്ടില്ല .ഇമാം ഇബ്നു കസീർ(റ)എഴുതുന്നു.ഈ സൂക്തം നബി(സ)ക്കുള്ള സാക്ഷ്യമാണ്.അവിടുന്ന് സന്മാർഗിയും സത്യത്തെ പിന്തുടരുന്നവരുമാണ്. ഒരിക്കലും വഴിതെറ്റിയിട്ടില്ല അതായത് അറിയാതെ അസത്യ വഴിയിൽ സഞ്ചരിച്ചിട്ടില്ല. അറിഞ്ഞു കൊണ്ട് സത്യം മന:സിലായിട്ടും സത്യത്തിൽ നിന്ന് തെറ്റുന്ന സമീപനം സ്വീകരിച്ചിട്ടുമില്ല. ഈ സാക്ഷ്യ പത്രം മുഖേന മാർഗഭ്രംശം സംഭവിച്ച ജൂത-കൃസ്ത്യാനികളുടെ നിലപാടുകളിൽ നിന്ന് (സത്യം മനസ്സിലായിട്ടും അത് മറച്ച് വെക്കുകയും അതിനു വിരുദ്ധമായി പ്രവർത്തിക്കുകയും ചെയ്യുക എന്നതാണ് അവരുടെ നിലപാട്) നബി(സ) ഒഴിവാണെന്നും അള്ളാഹുവിൽ നിന്ന് ലഭിച്ച മാർഗ നിർദേശങ്ങൾ പരിപൂർണ്ണമായി അവിടുന്ന് പാലിക്കുക വഴി നേർമാർഗത്തിലും ഹൃജുവായ പാതയിലും തന്നെയാണ് അവിടുന്ന് നില കൊള്ളുന്നതെന്നുമുള്ള സന്ദേശം നൽകുന്നു(ഇബ്നു കസീർ 4/359

 3. وَمَا يَنطِقُ عَنِ الْهَوَى

(3)നബി(സ) ദേഹേച്ഛക്കൊത്ത് സംസാരിക്കുകയില്ല

നബി(സ)ക്ക് അല്പം പോലും അബദ്ധം പറ്റിയില്ലെന്ന് മുൻ സൂക്തത്തിൽ വ്യക്തമാക്കിയല്ലോ. അതിന്റെ സ്ഥിരീകരണമാന് ഈ വാക്യം. ഒരിക്കലും സ്വന്തം താല്പര്യാർത്ഥം നബി(സ) ഒന്നും സംസാരിക്കുകയില്ല .ഇമാം റാസി(റ)എഴുതുന്നു,,രണ്ടാം സൂക്തത്തിൽ നബി(സ)സഞ്ചരിക്കുന്ന മാർഗ്ഗം വളരെ ശരിയായിട്ടുള്ളതാണെന്നും അതിൽ അവിടുത്തേക്ക് അബദ്ധം അശേഷം സംഭവിച്ചിട്ടില്ലെന്നും സൂചിപ്പിച്ച അള്ളാഹു അതിന്റെ സ്ഥിരീകരണമാണ് ഈ മൂന്നാം സൂക്തത്തിൽ പറയുന്നത്.അഥവാ ഒരു ലക്ഷ്യത്തിലെത്താനായി ഒരു വഴി അന്വേഷിക്കുന്ന വ്യക്തി ചിലപ്പോൾ വഴിയൊന്നും കാണാതെ വിഷമിച്ചേക്കാം .ചിലപ്പോൾ വഴി കണ്ടെത്തിയെങ്കിലും അത് വിദൂരവും പ്രയാസമേറിയതുമായെന്നു വരാം. ചിലപ്പോൾ ലഭ്യമായ വഴി വിശാലവും നിർഭയവുമാണെങ്കിലും വലത്തോട്ടോ ഇടത്തോട്ടോ തെറ്റി ദൂരം കൂടിയെന്നു വരാം, അപ്പോൾ ലക്ഷ്യ സ്ഥാനത്തെത്തുന്നത് താമസിക്കും.എന്നാൽ കൃത്യമായ വഴിയിലൂടെയാണ് സഞ്ചാരമെങ്കിൽ നിഷ്‌പ്രയാസം ലക്ഷ്യത്തിലെത്താം.. ! ഈ ഉദാഹരണത്തിലൂടെ മഹാൻ പറയുന്നത് നബി(സ) ജനങ്ങളെ ഉൽബോധിപ്പിച്ച് സത്യത്തിലെത്തിക്കാൻ നിയോഗിക്കപ്പെട്ടവരാണ്. ഇതിൽ ഒരു പിഴവും പറ്റാതിരിക്കുക വഴി അള്ളാഹു അവിടുത്തെ സംരക്ഷിച്ചിരിക്കുന്നു. കാരണം അവിടുന്ന് സ്വന്തം ഇഷ്ട പ്രകാരം ഒന്നും സംസാരിക്കുന്നില്ല പ്രത്യുത അള്ളാഹുവിന്റെ നിർദ്ദേശം അനുസരിച്ച് മാത്രമേ സംസാരിക്കുന്നുള്ളൂ

 4.إِنْ هُوَ إِلَّا وَحْيٌ يُوحَى

(4)അത് അവിടുത്തേക്ക് നൽകപ്പെടുന്ന ദിവ്യ ബോധനം മാത്രമാണ്

അള്ളാഹുവിൽ നിന്ന് ലഭിക്കുന്ന സന്ദേശങ്ങൾ അല്പം പോലും കൂട്ടുകയോ കുറക്കുകയോ ചെയ്യാതെ അവിടുന്ന് ജനങ്ങളിലേക്ക് എത്തിക്കുകയും പ്രബോധനം നടത്തുകയും ചെയ്തു. ഇബ്നു കസീർ(റ)എഴുതുന്നു.. അബ്ദുള്ളാഹിബ്നു അംറ് (റ) പറഞ്ഞു, ‘ഞാൻ നബി(സ)യിൽ നിന്ന് കേൾക്കുന്നതെല്ലാം മന:പാഠമാക്കാൻ ഉദ്ദേശിച്ചു കൊണ്ട് എഴുതുമായിരുന്നു.അപ്പോൾ ഖുറൈശികളിൽ ചിലർ എന്നെ എഴുതുന്നതിൽ നിന്ന്  വിലക്കി നബി(സ) ഒരു മനുഷ്യനല്ലേ. ദേഷ്യം വരുമ്പോൾ സംസാരിക്കുന്നത് ശരിയാവാതിരിക്കാൻ സാദ്ധ്യതയുണ്ടല്ലോ (അത് കൊണ്ട് പറയുന്നതൊക്കെ എഴുതരുത്) അപ്പോൾ ഞാൻ എഴുത്ത് നിർത്തുകയും നബി(സ)യോട് വിവരം പറയുകയും ചെയ്തു. അപ്പോൾ നബി(സ) എന്നോട് പറഞ്ഞു. “നീ എഴുതുക. അള്ളാഹുവാണേ സത്യം .സത്യമായ വാക്കല്ലാതെ എന്നിൽ നിന്ന് പുറത്ത് വരില്ല“ ,ഇമാം അബൂദാവൂദ് ഈ ഹദീസ് റിപ്പോർട്ട് ചെയ്തിട്ടുണ്ട്. അബൂ ഹുറൈറ:(റ)പറഞ്ഞു ‘ഞാൻ സത്യമേ പറയൂ എന്ന് നബി(സ) പറഞ്ഞു. അപ്പോൾ ചില ശിഷ്യന്മാർ ചോദിച്ചു അവിടുന്ന് ഞങ്ങളോട് തമാശ പറയാറുണ്ടല്ലോ. നബി(സ) പറഞ്ഞത് ഞാൻ സത്യമല്ലാതെ പറയില്ല. (തമാശ പോലും സത്യമായതേ പറയൂ. ഇമാം അഹ്്മദ്(റ) ഇത് റിപ്പോർട്ട് ചെയ്തിട്ടുണ്ട് (ഇബ്നു കസീർ 4/359) തമാശയിലും ദേഷ്യത്തിലും സംസാരിക്കുന്നത് പോലും സത്യം മാത്രം ആവും വിധത്തിൽ നബി(സ)യെ അള്ളാഹു സംരക്ഷിച്ചു എന്ന് ചുരുക്കം. ഇമാം റാസി(റ)എഴുതുന്നു. ഇത് ശത്രുക്കളുടെ പ്രചരണത്തിനുള്ള ശക്തമായ മറുപടിയാണ്. നബി(സ)യുടെ വാക്കുകൾ ജോത്സ്യന്മാരുടെ വാക്കുകളാണെന്നും കവികളുടെ വാക്കുകകളാണെന്നൊക്കെ അവർ പറഞ്ഞിരുന്നു. എന്നാൽ ഇത് അത്തരം വാക്കുകളല്ലെന്നു മാത്രമല്ല ദൈവിക സന്ദേശങ്ങൾ മാത്രമാവുന്നു. വെറും “വഹ് യ്“ എന്ന് മാത്രം പറഞ്ഞ് നിർത്താതെ ദിവ്യബോധനം നൽകപ്പെട്ടു എന്ന് കൂടി പറഞ്ഞത് ഇത് ആലങ്കാരികമായി പറഞ്ഞതല്ലെന്ന് തെളിയിക്കാനാണ്. കാരണം ശക്തമായി ഓടുന്ന കുതിരയെ സംബന്ധിച്ച് ചിലപ്പോൾ പറക്കുന്ന പക്ഷി എന്ന് ആലങ്കാരികമായി പറയും. അത്തരം അലങ്കാരമല്ല തികച്ചും ദിവ്യ ബോധനമെന്ന ആധികാരിക അറിവ് തന്നെയാണ് തങ്ങൾക്കുള്ളതെന്ന്സൂചിപ്പിക്കുകയാണിവിടെ (റാസി28/268)

5.عَلَّمَهُ شَدِيدُ الْقُوَى

(5)ശക്തമായ കഴിവുള്ള ഒരാൾ അവിടുത്തേക്ക് അത് പഠിപ്പിച്ചിരിക്കുന്നു

അള്ളാഹുവിൽ നിന്ന് നബി(സ) ജനങ്ങളിലേക്ക് എത്തിക്കുന്ന കാര്യങ്ങളെല്ലാം ശക്തനായ ജിബ്‌രീൽ (അ) ആണ് നബി(സ)ക്ക് പഠിപ്പിക്കുന്നത്. ഇമാം ബൈളാവി(റ)എഴുതുന്നു. ഈ ശക്തൻ ജിബ്‌രീൽ(അ)ആണ്. കാരണം അമാനുഷികങ്ങൾ വെളിപ്പെടുത്തുന്നതിലെ മാദ്ധ്യമമാണ് ജിബ് രീൽ(അ). ലൂഥ് നബി(അ)ന്റെ ഗ്രാമം പറിച്ചെടുത്ത് മേലോട്ടുയർത്തിപ്പിടിച്ച് അവരുടെ മുകളിൽ തന്നെ മറിച്ചിട്ടതും തന്റെ ഒരൊറ്റ ശബ്ദം കൊണ്ട് സമൂദ് വിഭാഗത്തെ തകർത്തതും അദ്ദേഹത്തിന്റെ ശക്തിയുടെ തെളിവാണ് (ബൈളാവി 2/438)

  6.ذُو مِرَّةٍ فَاسْتَوَى

(6)(അതെ) തികഞ്ഞ ബുദ്ധിശക്തിയും പ്രാബല്യവുമുള്ള ഒരാൾ.അങ്ങനെ അവിടുന്ന് ശരിയായി നില കൊണ്ടു.(സാക്ഷാൽ രൂപത്തിൽ പ്രത്യക്ഷപ്പെട്ടു)

മിർ റ:എന്ന പദത്തിനു ബുദ്ധി ശക്തി, സൌന്ദര്യമുള്ള പ്രകൃതി എന്നെല്ലാം അർത്ഥമുണ്ട്. ജിബ്‌രീൽ(അ) ശക്തനും സൌന്ദര്യ പ്രകൃതിയുള്ളവരുമാണെന്ന് ചുരുക്കം. ശക്തനും പല വിധ കഴിവുകളുള്ളവരുമായ  ജിബ്‌രീൽ(അ) ആണ്  അത് നബി(സ)ക്ക് പഠിപ്പിക്കുന്നത് . ജിബ്‌രീൽ(അ) എന്ന മലക്കാണ് അള്ളാഹുവിന്റെ അനുമതി പ്രകാരം ആ സന്ദേശം നബി(സ)ക്ക് എത്തിച്ചു കൊടുക്കുന്നതെന്ന് ഖുർആൻ 2/97-ൽകാണാം വിശ്വസ്ഥനായ ആത്മാവ് എന്ന് 26/193-ലും പരിശുദ്ധാത്മാവ് എന്ന് 16/102-ലും ഖുർആൻ പ്രസ്താവിച്ചിട്ടുണ്ട്

 7.وَهُوَ بِالْأُفُقِ الْأَعْلَى

(7)അദ്ദേഹം സമുന്നത നഭോ മണ്ഡലത്തിലായ സ്ഥിതിയിൽ

നബി(സ)ക്ക് ആദ്യമായി  ഖുർആനിൽ നിന്ന് അവതരിച്ചത് സൂറത്തുൽ ‘അലഖി‘ന്റെ ആദ്യ ഭാഗമായിരുന്നുവെന്നത് എല്ലാവർക്കും അറിയാമല്ലോ.പിന്നീട് കുറേ നാളത്തേക്ക്  തീരേ വഹ്‌യുമായി ജിബ്്രീൽ(അ) വന്നില്ല. ഇതിൽ നബി(സ)ക്ക് വലിയ വിഷമം അനുഭവപ്പെട്ടു. അങ്ങനെ ഒരിക്കൽ ജിബ്‌രീൽ(അ) തന്റെ ശരിയായ രൂപത്തിൽ പ്രത്യക്ഷപ്പെട്ടു അപ്പോൾ അദ്ദേഹത്തിനു 600 ചിറകുകളുണ്ടായിരുന്നു ആകാശ ഭൂമിക്കിടയിൽ -വായു മണ്ഡലത്തിൽ -ഒരു പീഠത്തിലിരിക്കുന്ന അവസ്ഥയിയിലായിരുന്നു പ്രത്യക്ഷപ്പെട്ടത് അദ്ദേഹത്തിന്റെ ആ വമ്പിച്ച സൃഷ്ടി രൂപം ചക്ര വാളത്തിന്റെ ഉപരിഭാഗം മുഴുവനും മൂടും വിധത്തിലായിരുന്നു ഇതിനെ സംബന്ധിച്ചാണ്  ആറാം വാക്യത്തിന്റെ അവസാനത്തിലും ഏഴാം വാക്യത്തിലും പരാമർശിക്കുന്നത്. ജിബ്‌രീൽ(അ)നെ തന്റെ സാക്ഷാൽ രൂപത്തിൽ നബി(സ) അല്ലാത്ത ഒരു പ്രവാചകനും കണ്ടിട്ടില്ല നബി(സ) രണ്ട് തവണ ജിബ് രീൽ(അ)നെ കണ്ടിട്ടുണ്ട് (ബൈളാവി 2/438)

 8.ثُمَّ دَنَا فَتَدَلَّى

(8) പിന്നീട് അദ്ദേഹം അടുത്തു. കൂടുതൽ അടുത്തു വന്നു

ചക്ര വാളത്തിനു മുകളിൽ പ്രത്യക്ഷപ്പെട്ട ജിബ്‌രീൽ(അ) നബി(സ)യോട് വളരെ അടുത്ത് വന്നു

 9.فَكَانَ قَابَ قَوْسَيْنِ أَوْ أَدْنَى

(9)എന്നിട്ട് രണ്ട് വില്ലിന്റെ അളവിലായി.അല്ലെങ്കിൽ അതിലും കൂടുതൽ അടുപ്പത്തിലായിത്തീർന്നു

രണ്ട് വസ്തുക്കൾ തമ്മിലൂള്ള അടുപ്പത്തിന്റെ അങ്ങേ അറ്റം കാണിക്കാനുള്ള ഒരു അലങ്കാര പ്രയോഗമാണിത്

 10. فَأَوْحَى إِلَى عَبْدِهِ مَا أَوْحَى

(10)എന്നിട്ടദ്ദേഹം അള്ളാഹുവിന്റെ ദാസനു ബോധനം നൽകിയതെല്ലാം ബോധനം നൽകി

അങ്ങനെ വളരെയധികം അടുത്ത ശേഷം നബി(സ)ക്ക് ജിബ്‌രീൽ(അ)  അള്ളാഹുവിൽ നിന്നുള്ള ദിവ്യ ബോധനം നൽകി  അത് എന്തൊക്കെയാണെന്ന് ഇവിടെ വ്യക്തമാക്കിയിട്ടില്ല. നൽകപ്പെടുന്ന ബോധനത്തിന്റെ വൈപുല്യവും ബഹുമാനവും സൂചിപ്പിക്കാനാണിങ്ങനെയൊരു പ്രയോഗം എന്ന് ഇമാം ബൈളാവി എഴുതുന്നുണ്ട്

 11.مَا كَذَبَ الْفُؤَادُ مَا رَأَى

11)അവിടുന്ന് കണ്ടതിനെ അവിടുത്തെ ഹൃദയം നിഷേധിച്ചിട്ടില്ല

നബി(സ) കണ്ണ് കൊണ്ട് കണ്ടതിനെക്കുറിച്ച് എന്തെങ്കിലും സംശയം തോന്നി അതിനെ അവിടുത്തെ ഹൃദയം നിഷേധിച്ചിട്ടില്ല മറിച്ച് അത് സത്യം തന്നെയെന്ന് അവിടുത്തേക്ക് ബോധ്യപ്പെടുക തന്നെ ചെയ്തു

 12.أفَتُمَارُونَهُ عَلَى مَا يَرَى

(12) എന്നിരിക്കെ താൻ കാണുന്നതിന്റെ പേരിൽ അവിടുത്തോട് നിങ്ങൾ സംശയിച്ച് തർക്കിക്കുകയാണോ?

നബി(സ)ക്ക് ലഭിച്ച ദർശനത്തെ സംബന്ധിച്ച് അവിടുത്തേക്ക് ഉറപ്പുള്ള സ്ഥിതിക്ക് ഒന്നുമറിയാതെ നിങ്ങൾ അത് നിഷേധിക്കുകയും നബി(സ)യോട് തർക്കിക്കുകയും ചെയ്യുന്നത് ഒട്ടും ശരിയായ രീതിയല്ല

13. وَلَقَدْ رَآهُ نَزْلَةً أُخْرَى

(13)നിശ്ചയമായും മറ്റൊരു പ്രാവശ്യവും നബി(സ) അദ്ദേഹത്തെ(ജിബ് രീൽ(അ)നെ)കണ്ടിട്ടുണ്ട്

നബി(സ) ജിബ്‌രീൽ(അ) നെ സാക്ഷാൽ രൂപത്തിൽ കണ്ട രണ്ടാമത്തെ സന്ദർഭമാണിവിടെ വിവരിക്കുന്നത്

 14. عِندَ سِدْرَةِ الْمُنْتَهَى

(14) സിദ് റത്തുൽ മുൻ തഹായുടെ അടുത്ത് വെച്ച്

അറ്റത്തെ ഇലന്തമരം എന്നാണ് ഈ വാക്കിന്റെ അർത്ഥം.മുകളിൽ നിന്ന് താഴോട്ടിറങ്ങുന്ന കാര്യങ്ങളും താഴേ നിന്ന് മുകളിലോട്ടുയരുന്ന കാര്യങ്ങളും ചെന്നവസാനിക്കുന്ന കേന്ദ്രമാണതെന്ന് ഹദീസിൽ പ്രസ്താവിച്ചത് കാണാം അതാണ് അറ്റം എന്നതിന്റെ സാരം. അദൃശ്യ ലോകത്തുള്ള ഈ അത്ഭുത മരത്തെക്കുറിച്ച് മിഅ്റാജിന്റെ യാത്രയിൽ കണ്ട കാഴ്ച വിവരിച്ചു കൊണ്ട് നബി(സ)പറയുന്നു, ‘പിന്നീട് ഞാൻ സിദ്റതുൽ മുൻത ഹായിലേക്ക് ഉയർത്തപ്പെട്ടു.അപ്പോൾ അതിന്റെ പഴങ്ങൾ ഹജർ നാട്ടിലെ തോല്പാത്രങ്ങൾ പോലെയും ഇലകൾ ആനയുടെ ചെവികൾ പോലെയുമിരിക്കുന്നു‘ (ബുഖാരി,മുസ് ലിം)

15. عِندَهَا جَنَّةُ الْمَأْوَى

(15) അതിന്റെ അടുത്താണ് ആവാസത്തിന്റെ സ്വർഗ്ഗം

ഇവിടെ പറഞ്ഞ സ്വർഗം കൊണ്ട് എന്താണ് ഉദ്ദേശ്യമെന്നതിൽ വ്യത്യസ്ഥ അഭിപ്രായങ്ങളുണ്ട് ദൈവ ഭക്തിയിൽ ജീവിച്ചവർക്ക് വാഗ്ദാനം ചെയ്യപ്പെട്ട സാക്ഷാൽ സ്വർഗ്ഗമാണെന്നും രക്ത സാക്ഷികളുടെ ആത്മാക്കൾക്കുള്ള ആവാസ കേന്ദ്രമെന്നും മാലാഖമാർക്കുള്ള പ്രത്യേക കേന്ദ്രമെന്നും അഭിപ്രായമുണ്ട്(റാസി28/276)

16. إِذْ يَغْشَى السِّدْرَةَ مَا يَغْشَى

(16)അതായത് ആ ഇലന്ത മരത്തെ അനാവരണം ചെയ്തതെല്ലാം ആവരണം ചെയ്തിരുന്നപ്പോൾ

നബി(സ) മിഅ്റാജിന്റെ യാത്രയിൽ സിദ്റത്തുൽ മുൻതഹാ എന്ന മരത്തിനടുത്തെത്തിയപ്പോൾ അതിനെ പലതും ആവരണം ചെയ്തു എന്ന് പറഞ്ഞതിന്റെ ഉദ്ദേശ്യം എന്താണെന്ന വിഷയത്തിൽ വ്യത്യസ്ത വീക്ഷണമുണ്ട്. ഇമാം റാസി(റ)എഴുതുന്നു ..”സ്വർണ്ണത്തിന്റെ വെട്ടു കിളികളെയും പക്ഷിക്കൂട്ടങ്ങളെയും ആ മരത്തിൽ നിറച്ചു എന്നാണ് ഒരു വീക്ഷണം.പക്ഷിക്കൂട്ടങ്ങളെ പോലെ മാലാഖമാർ ആ മരത്തെ പൊതിഞ്ഞു എന്നാണ് മറ്റൊരു വീക്ഷണം.വിശ്വാസികൾ കഅ്ബയെ സന്ദർശിക്കുമ്പോലെ മലക്കുകൾ അനുഗ്രഹം തേടി ഇവിടെ സന്ദർശകരായി എത്തുന്നു അള്ളാഹുവിന്റെ പ്രകാശമാണ് മരത്തെ ആവരണം ചെയ്തതെന്നാണ് മൂന്നാം വീക്ഷണം അതെന്താണെന്ന് പറയാനാവാത്ത അത്രയും അത്ഭുതകരാമായത് ആവരണം ചെയ്തു എന്ന് നാലാം വീക്ഷണം

 17. مَا زَاغَ الْبَصَرُ وَمَا طَغَى

(17)നബി(സ)യുടെ കാഴ്ച തെറ്റിപ്പോയിട്ടില്ല.അത് ക്രമം വിട്ടിട്ടുമില്ല

കാഴ്ച തെറ്റിപ്പോയിട്ടില്ല എന്ന് പറഞ്ഞത് നബി(സ)യുടെ കാഴ്ച തെട്ടിപ്പോയിട്ടില്ലെന്നാണെന്നും ഈ സ്ഥലത്ത് ഒരു കാഴ്ചയും തെറ്റിപ്പോവുകയില്ലെന്നും രണ്ട് വീക്ഷണമുണ്ട്. ഒന്നാം വ്യാഖ്യാനമനുസരിച്ച് സിദ്റത്തുൽ മുൻ തഹയെ ആവരണം ചെയ്ത അത്ഭുതങ്ങൾ സ്വർണ്ണത്തിന്റെ വെട്ട് കിളിയോ പക്ഷിയോ ആണെന്ന വീക്ഷണമനുസരിച്ച് അത് കണ്ടപ്പോൾ നബി(അ) അതിൽ മതിമറന്ന് അള്ളാഹുവെ വിസ്മരിച്ചില്ല. എന്നല്ല ആ ഭൌതിക സംവിധാനത്തിൽ അശേഷം തങ്ങളുടെ കണ്ണ് മഞ്ഞളിച്ചില്ല .അത് നബി(സ)ക്കുള്ള വലിയൊരു പരീക്ഷണമായിരുന്നു.അതിൽ നബി(സ) വിജയിച്ചു എന്ന സാക്ഷ്യമാണിത്.അള്ളാഹുവിന്റെ പ്രകാശമാണ് ആവരണം ചെയ്തതെന്ന വീക്ഷണമനുസരിച്ച് ഇടത്തോട്ടും വലത്ത് നോക്കി തന്റെ ശ്രദ്ധ അള്ളാഹു ഇഷ്ടപ്പെടുന്ന സ്ത്ഥിതിയിൽ നിന്ന് മറ്റൊന്നിലേക്ക് തിരിച്ചില്ല മറിച്ച് ആ പ്രഭ സാകൂതം വീക്ഷിച്ചു കൊണ്ടേയിരുന്നു എന്നാണ് അർത്ഥം .മൂസ(അ) അള്ളാഹുവിന്റെ പ്രഭ പർവതത്തിലേക്ക് പ്രത്യക്ഷപ്പെടുന്നത് കണ്ടപ്പോൾ ബോധം കെട്ടത് പോലെ നബി(സ)ക്ക് ഒരു പ്രയാസവുമുണ്ടായില്ല എന്നും വ്യാഖ്യാനമുണ്ട്.നബി(സ)ലക്ഷ്യത്തിൽ നിന്ന് തെറ്റിയില്ലാ എന്ന ഒന്നാം വ്യാഖ്യാനം അവിടുത്തെ അദബിന്റെ തെളിവാണെന്നും ബോധക്ഷയമുണ്ടായില്ല എന്ന വ്യാഖ്യാനം നബി(സ)യുടെ ശക്തിയുടെ രേഖയാണെന്നും സൂചനയുണ്ട് ഒരു കാഴ്ചയും ഇവിടെ തെറ്റുകയില്ല എന്ന രണ്ടാം വീക്ഷണമനുസരിച്ച് ആ സ്ഥലത്തിന്റെ ഗാംഭീര്യം കാരണം ഒരു കാഴ്ചയും തെറ്റുകയില്ല എന്നാണ് ഉദ്ദേശ്യം (റാസി28/277)

 18. لَقَدْ رَأَى مِنْ آيَاتِ رَبِّهِ الْكُبْرَى

(18) നിശ്ചയമായും തന്റെ രക്ഷിതാവിന്റെ അതി മഹത്തായ ദ്ര്‌ഷ്ടാന്തങ്ങളിൽ നിന്ന് പലതും നബി(സ) കാണുകയുണ്ടായി

അള്ളാഹുവിന്റെ തെളിവുകളിൽ നിന്ന് ധാരാളം കാര്യങ്ങൾ കണ്ടു എന്നതിനു അദ്ര്‌ശ്യ ലോകത്തെയും മറ്റും ധാരാളം അത്ഭുതങ്ങൾ എന്നും സ്വർഗ്ഗത്തിൽ നിന്നുള്ള ഒരു പച്ചപ്പരവതാനി ചക്രവാളത്തെ മൂടും വിധത്തിൽ കണ്ടു എന്നും ജിബ് രീൽ(അ)നെ സാക്ഷാൽ രൂപത്തിൽ കണ്ടു എന്നും വ്യാഖ്യാനമുണ്ട് (ബൈളാവി/ഥിബ്്രി)

19  .  أَفَرَأَيْتُمُ اللَّاتَ وَالْعُزَّى

(19) എന്നാൽ ലാത്തയെയും ഉസ്സയെയും കുറിച്ച് നിങ്ങൾ ചിന്തിച്ചിട്ടുണ്ടോ? (അവ ആരാധിക്കപ്പെടുവാൻ അർഹതയുള്ളതാണോ?)

 20. وَمَنَاةَ الثَّالِثَةَ الْأُخْرَى

(20) മറ്റെ മൂന്നാമത്തെ മനാത്തയെ കുറിച്ചും?

അള്ളാഹുവിന്റെ അപാരമായ കഴിവുകളിലേക്കും മുഹമ്മദ് നബി(സ)യുടെ സത്യ സന്ധതയിലേക്കും ആധികാരികതയിലേക്കും ശക്തമായ തെളിവുകളാണ് ഈ അദ്ധ്യായത്തിന്റെ ആദ്യ ഭാഗത്ത് സമർത്ഥിച്ചത് .ശേഷം ഇവിടെ ചോദിക്കുന്നത് ആ അതി ശക്തിമാനായ അള്ളാഹുവിനു പുറമേ നിങ്ങൾ മിനഞ്ഞെടുക്കുന്ന നിസ്സാര വസ്തുക്കൾക്ക് ആരാധനയർപ്പിക്കുന്നതിന്റെ വിവരക്കേട് ഒന്ന് ആലോചിച്ചു നോക്കൂ.അതെക്കുറിച്ച് നിങ്ങൾക്ക് എന്താണ് പറയാനുള്ളത് എന്നാ‍ണിവിടെ ചോദിക്കുന്നത്. ഥാഇഫുകാർ ആരാധിച്ചിരുന്ന ബിംബമാണ് ലാത്ത! മക്കയുടെയും ഥാഇഫിന്റെയും ഇടയിലുള്ള ഒരു മരമായിരുന്നു ഉസ്സാ! ഒരു ക്ഷേത്രത്തിലായിരുന്നു അത് ഖുറൈശികൾ അതിനെ ആരാധിച്ചിരുന്നു മക്കയുടെയും മദീനയുടെയും ഇടയിൽ മുശല്ലൽ എന്ന സ്ഥലത്ത് പ്രതിഷ്ഠിക്കപ്പെട്ട ഒരു ബിംബമാണ് മനാത്ത്! ഖുസാ‍അ: ഹുദൈൽ, ഔസ്, ഖസ്റജ്, മുതലായ ഗോത്രങ്ങളായിരുന്നു അതിനെ ആരാധിച്ചിരുന്നത്. അറബി മുശ്‌രിരിക്കുകൾ ആരാധിച്ചിരുന്ന അനേകം ബിംബങ്ങളിൽ ഏറ്റവും പ്രസിദ്ധി നേടിയവയാണ് ഈ മൂന്നെണ്ണം. മറ്റേ മൂന്നാമത്തത് എന്ന പ്രയോഗം അതിനെ നിന്ദിക്കുന്ന ഒരു പ്രയോഗമാണ്

ഇമാം റാസി(റ)എഴുതുന്നു.  “ഈ അദ്ധ്യായത്തിന്റെ ആദ്യത്തിൽ നബി(സ)യുടെ പ്രവാചകത്വം സ്ഥിരീകരിച്ചപ്പോൾ പ്രവാചകന്റെ ദൌത്യവുമായി ഏറ്റവും ബന്ധപ്പെട്ട കാര്യം വിശദീകരിക്കാൻ തുടങ്ങി. അഥവാ അള്ളാഹുവിന്റെ ഏകത്വം സ്ഥിരീകരിക്കലും ബഹുദൈവാരാധനയെ നിഷേധിക്കലും (ഇതാണല്ലോ ഏറ്റവും ആദ്യം എല്ലാ പ്രവാചകരും നടപ്പാ‍ക്കിയത്) ലാത്തയേയും ഉസ്സയെയും കുറിച്ച് നിങ്ങൾ ചിന്തിച്ചിട്ടുണ്ടോ ? എന്ന ചോദ്യം അള്ളാഹുവിനോട് ഈ നിസ്സാര വസ്തുക്കളെ സമമാക്കുന്നതിന്റെ ബുദ്ധി ശൂന്യത സമർത്ഥിക്കുന്നുണ്ട്. ലാത്ത ഥാഇഫിലെ സഖീഫ് ഗോത്രക്കാർ ആരാധിച്ചിരുന്ന ബിംബമാണ്. നെയ്യ് ഉപയോഗിച്ച് ഭക്ഷണമുണ്ടാക്കി ആളുകൾക്ക് നൽകിയിരുന്ന ഒരു നല്ല മനുഷ്യൻ മരണപ്പെട്ടപ്പോൾ അദ്ദേഹത്തിന്റെ പ്രതിമയുണ്ടാക്കി ആരാധിക്കുകയും ലാത്ത എന്ന് പേരു വെക്കുകയും ചെയ്തതാണെന്നും അഭിപ്രായമുണ്ട്. ഉസ്സാ ആരാധിക്കപ്പെട്ടിരുന്ന ഒരു മരമാണ്. നബി(സ) ഖാലിദ് ബിൻ വലീദ്(റ)നെ അയച്ച് അത് മുറിച്ച് കളയുകയും മുറിച്ചപ്പോൾ അതിന്റെ അകത്ത് നിന്ന് ഒരു പെൺ പിശാച് പാറിപ്പറക്കുന്ന മുടിയുമായി പുറത്ത് വരികയും എന്റെ നാശമേ. എന്ന് പറഞ്ഞ് നില വിളിക്കുകയും ഖാലിദ്(റ)നിസ്സങ്കോജം അതിനെ കൊലപ്പെടുത്തുകയും ചെയ്തു. ഇത് നബി(സ)യോട് അറിയിച്ചപ്പോൾ ഇനി ഉസ്സാ ആരാധിക്കപ്പെടില്ലെന്ന് നബി(സ)പ്രതികരിക്കുകയും ചെയ്തു.  ഹുദൈൽ ഗോത്രവും ഖുസാ അ:ഗോത്രക്കാരുമൊക്കെ ആരാധിച്ചിരുന്ന ഒരു കല്ലാണ് മനാത്ത. ഈ ബിംബങ്ങൾക്ക് ഇങ്ങനെ പരാമർശത്തിൽ ക്രമം വന്നതിന്റെ കാരണം ലാത്ത മനുഷ്യ രൂപത്തിലുണ്ടാക്കപ്പെട്ടതിനാലും ഉസ്സാ മരമായിരുന്നതിനാലും മനാത്ത നിർജ്ജീവ വസ്തുവായ കല്ലായതിനാലുമാണ്. അതായത് മരത്തേക്കാൾ ശ്രേഷ്ഠമാണ് മനുഷ്യൻ. കല്ലിനേക്കാൾ ശ്രേഷ്ഠമാണ് മരം (റാസി28/279)

21. أَلَكُمُ الذَّكَرُ وَلَهُ الْأُنثَى

(21)നിങ്ങൾക്ക് ആണും അവന്(അള്ളാഹുവിനു്)പെണ്ണുമോ?

22. تِلْكَ إِذًا قِسْمَةٌ ضِيزَى

(22) അങ്ങനെയാണെങ്കിൽ അത് അനീതിപരമായ ഒരു പങ്കുവെക്കലാണ്

തങ്ങൾ ആരാ‍ധിച്ചു വരുന്ന ബിംബങ്ങളിൽ ചിലത് മലക്കുകളുടെ പ്രതിഷ്ഠകളാണെന്നും മലക്കുകൾ അള്ളാഹുവിന്റെ പെൺ മക്കളാണെന്നും ആയിരുന്നു മക്കക്കാരുടെ വിശ്വാസം.പെൺ മക്കളാണെങ്കിലോ അവർ വെറുക്കുന്ന ഒരു വിഭാഗവും!ആ സ്ഥിതിക്ക് തങ്ങളിഷ്ടപ്പെടുന്ന ആൺ മക്കൾ അവർക്കും അവർ വെറുക്കുന്ന പെൺ മക്കൾ അള്ളാഹുവിനും നിശ്ചയിക്കുന്ന ഈ ഓഹരി വെക്കൽ തീരേ നീതീകരിക്കാൻ കഴിയാത്തതാണ് എന്നാണിവിടെ സൂചിപ്പിക്കുന്നത്

23. إِنْ هِيَ إِلَّا أَسْمَاء سَمَّيْتُمُوهَا أَنتُمْ وَآبَاؤُكُم مَّا أَنزَلَ اللَّهُ بِهَا مِن سُلْطَانٍ إِن يَتَّبِعُونَ إِلَّا الظَّنَّ وَمَا تَهْوَى الْأَنفُسُ وَلَقَدْ جَاءهُم مِّن رَّبِّهِمُ الْهُدَى

(23)അത് നിങ്ങളും നിങ്ങളുടെ പിതാക്കളും നാമകരണം ചെയ്ത ചില പേരുകൾ മാത്രമാണ്.അതിനെ പറ്റി യാതൊരു ലക്ഷ്യവും അള്ളാഹു അവതരിപ്പിച്ചിട്ടില്ല വെറും ഊഹത്തെയും തങ്ങളുടെ മനസ്സുകൾ ഇഛിക്കുന്നതിനെയുമല്ലാതെ അവർ(ആ മുശ് രിക്കുകൾ)പിൻ പറ്റുന്നില്ല(വാസ്തവത്തിൽ)അവർക്ക് തങ്ങളുടെ രക്ഷിതാവിങ്കൽ നിന്ന് നേർമാർഗം വന്നു കിട്ടിയിട്ടുണ്ട് താനും(എന്നിട്ടും അവർ കൃത്രിമ ദൈവങ്ങളെ കൈവിടുന്നില്ല)

ധാരാളം വസ്തുക്കളെ ദൈവങ്ങളാക്കി കൊണ്ട് നടന്നിരുന്ന ആ ജനതയുടെ നിലപാടുകളെ പൂർണ്ണമായി അള്ളാഹു നിരാകരിക്കുകയാണ്.ലാത്ത,ഉസ്സ,മനാത്ത എന്നിങ്ങനെ ചില വസ്തുക്കൾക്ക് പേരു വെച്ചതും അവയെ ആരാധിക്കുന്നതും നിങ്ങൾ സ്വന്തം മിനഞ്ഞെടുത്തതാണെന്നും അതിനു അള്ളാഹു അനുവാദം തരികയോ തെളിവിന്റെ ഒരു സൂചന നൽകുകയോ ചെയ്തിട്ടില്ലെന്നും അള്ളാഹുവിനെ മാത്രമേ ആരാധിക്കാവൂ എന്ന് കാര്യ കാരണ സഹിതം വിശദീകരിക്കപ്പെട്ടിട്ടുണ്ടെന്നിരിക്കെ ഈ നിലപാട് തികച്ചും നിഷേധാത്മകമാണെന്ന് സാരം.

ഇമാം റാസി(റ)എഴുതുന്നു.അള്ളാഹുവിനെ മാത്രം ആരാധിക്കണമെന്ന കാര്യം ഉറപ്പാണെന്നിരിക്കെ ആ ഉറപ്പ് സ്വീകരിക്കാതെ ഊഹങ്ങളുടെ പിന്നാലെ പോയത് വളരെ മോശം!ഇവിടെ പറഞ്ഞ  നേർമാർഗം എന്നതിന്റെ ഉദ്ദേശം ഖുർആനാണെന്നും അള്ളാഹുവിന്റെ ദൂതന്മാരാണെന്നും പ്രവാചകന്മാരുടെ അമാനുഷിക സിദ്ധികളാണെന്നും അഭിപ്രായമുണ്ട്(റാസി 28/230)

24. أَمْ لِلْإِنسَانِ مَا تَمَنَّى

(24) അതല്ല മനുഷ്യന് അവൻ കൊതിക്കുന്നതെല്ലാം ലഭിക്കുമെന്നുണ്ടോ?

അള്ളാഹുവിന്റെ കല്പനകൾക്ക് വിരുദ്ധമായ പ്രവർത്തനങ്ങൾ നടത്തുന്ന ഈ ജനതയുടെ നിലപാട് കണ്ടാൽ മനുഷ്യനു സ്വതന്ത്രമായി താൻ ആഗ്രഹിക്കുന്നതെന്തും വിവേചന രഹിതമായി ചെയ്യാനുള്ള സ്വാതന്ത്ര്യമുണ്ടെന്നും അത് അവനു നേടാൻ സാധിക്കുമെന്നുമാണ് തോന്നുക എന്നാൽ ആ നിലപാട് ഒരിക്കലും ശരിയല്ലെന്നാണ് ഇവിടെ സൂചിപ്പിക്കുന്നത്. അതിന്റെ കാരണമാണ് താഴേയുള്ള സൂക്തം

25. فَلِلَّهِ الْآخِرَةُ وَالْأُولَى

(25) എന്നാൽ പരലോകവും ഇഹലോകവും അള്ളാഹുവിന്റേതാണ്

രണ്ട് ലോകത്തിന്റെയും ഉടമസ്ഥൻ അള്ളാഹുവാണ്.അവന്റെ തീരുമാനത്തിനും ഇഷ്ടത്തിനുമനുസരിച്ചാണ് കാര്യങ്ങൾ നടക്കേണ്ടത്.അതിനു വിരുദ്ധമായ നിലപാടുകൾ സ്വന്തം നാശത്തിന്റെ വഴി തുറക്കാനേ സഹായിക്കൂ.ഇമാം റാസി(റ)എഴുതുന്നു.മനുഷ്യൻ തന്റെ ഇഷ്ടമനുസരിച്ച് ഒരു ആരാധ്യനെ തിരഞ്ഞെടുത്താൽ രണ്ട് ലോകത്തിന്റെയും ഉടമസ്ഥനായ അള്ളാഹു ഒരു പക്ഷെ ഭൂമിയിൽ നിന്ന് തന്നെ അവനെ ശിക്ഷിക്കും.ഇല്ലെങ്കിൽ തന്നെ പരലോകത്ത് അതിന്റെ ദുരന്തം അവൻ ഏറ്റു വാങ്ങേണ്ടി വരും(റാസി 28/285)

26. وَكَم مِّن مَّلَكٍ فِي السَّمَاوَاتِ لَا تُغْنِي شَفَاعَتُهُمْ شَيْئًا إِلَّا مِن بَعْدِ أَن يَأْذَنَ اللَّهُ لِمَن يَشَاء وَيَرْضَى

(26) ആകാശങ്ങളിൽ എത്രയോ മലക്കുകളുണ്ട് അള്ളാഹു ഉദ്ദേശിക്കുകയും അവൻ തൃ‌പ്തിപ്പെടുകയും ചെയ്യുന്നവർക്ക് (ശുപാർശ ചെയ്യുവാൻ)അവൻ അനുമതി നൽകിയ ശേഷമല്ലാതെ ആ മലക്കുകളുടെ ശുപാർശ ഒട്ടും പ്രയോജനപ്പെടുകയില്ല

മലക്കുകളുടെ പ്രതിഷ്ഠയാണെന്ന് പറഞ്ഞ് ചില വിഗ്രഹങ്ങളെ ആരാധിച്ച സത്യ നിഷേധികൾ അവർ ശുപാർശ ചെയ്ത് തങ്ങളെ രക്ഷിക്കുമെന്ന് ധരിക്കേണ്ടതില്ലെന്നും അള്ളാഹുവിന്റെ അനുമതിയോടെ അവൻ ഇഷ്ടപ്പെടുന്നവർക്ക് മാത്രമേ അവർ ശുപാർശ ചെയ്യുകയുള്ളൂവെന്നും ബഹുദൈവ വാദികൾ ആ ഗണത്തിൽ വരില്ലെന്നും സാരം.അള്ളാഹു അല്ലാത്ത ദൈവങ്ങളെ ആരാധിക്കുന്നവർ പറയാറുള്ള ഒരു ദുർ ന്യായത്തിനുള്ള ശക്തമായ മറുപടിയാണീ സൂക്തം.അള്ളാഹുവിന്റെ സമ്മതമില്ലാതെ തന്നെ ശുപാർശ ചെയ്ത് തങ്ങളെ രക്ഷപ്പെടുത്താൻ  ഈ ദൈവങ്ങൾക്കാകും എന്നാണ് അവരുടെ വാദം.എന്നാൽ ഒരിക്കലും അത് സാദ്ധ്യമല്ല എന്ന് ധാരാളം സ്ഥലത്ത് ഖുർ ആൻ വ്യക്തമാക്കിയിരിക്കുന്നു.ശുപാർശയേ നടക്കില്ല എന്നല്ല ഇതിന്റെ അർത്ഥം.അള്ളാഹുവിന്റെ അനുമതിയോടെ ശുപാർശ ചെയ്യാൻ പലർക്കും അവകാശമുണ്ട്.ആ ശുപാർശ ഫലപ്രദവുമാണ്. ഉദാഹരണം രണ്ടാം അദ്ധ്യായം (അൽ ബഖറ:255)മത് സൂക്തം നോക്കാം.

 (2.255)  مَن ذَا الَّذِي يَشْفَعُ عِنْدَهُ إِلاَّ بِإِذْنِهِ

(2/255)അള്ളാഹുവിന്റെ അനുമതി കൂടാതെ ശുപാർശ ചെയ്യാൻ ആരാണുള്ളത്.?

അള്ളാഹുവിന്റെ സമ്മതം കൂടാതെ ശുപാർശ ചെയ്ത് കീഴ് ദൈവങ്ങൾ ഞങ്ങൾക്ക് വാങ്ങിത്തരുമെന്ന ബഹു ദൈവ വാദികളുടെ വാദം നിരാകരിക്കുന്നതോടൊപ്പം നബിമാരുടെയും ഔലിയാക്കളുടെയും അനുമതിയോടെയുള്ള ശുപാർശയെ സാധൂകരിക്കുകയും ചെയ്യുന്ന വ്യക്തമായ പ്രഖ്യാപനമാണിത്

27. إِنَّ الَّذِينَ لَا يُؤْمِنُونَ بِالْآخِرَةِ لَيُسَمُّونَ الْمَلَائِكَةَ تَسْمِيَةَ الْأُنثَى

(27) നിശ്ചയമായും പരലോകത്തിൽ വിശ്വസിക്കാത്തവർ പെണ്ണുങ്ങളുടെ നാമകരണം (പോലെ)മലക്കുകൾക്ക് നാമകരണം ചെയ്യുന്നു

28. وَمَا لَهُم بِهِ مِنْ عِلْمٍ إِن يَتَّبِعُونَ إِلَّا الظَّنَّ وَإِنَّ الظَّنَّ لَا يُغْنِي مِنَ الْحَقِّ شَيْئًا

(28)അവർക്കാകട്ടെ അതെക്കുറിച്ച് ഒരു അറിവുമില്ല. അവർ ഊഹത്തെ മാത്രമാണ് പിൻ പറ്റുന്നത് ഊഹമാകട്ടെ സത്യത്തെക്കുറിച്ച് ഒട്ടും ഉപകരിക്കുന്നതേയല്ല

പരലോകത്തിൽ വിശ്വാസമില്ലാത്തവരായതോടൊപ്പം തന്നെ മുശ് രിക്കുകൾ  മലക്കുകളെ അള്ളാഹുവിന്റെ പെൺ മക്കളായി അവതരിപ്പിക്കുകയും മലക്കുകൾക്ക് സ്ത്രീകളുടെ പേരു പറയുകയും ചെയ്യുന്നു മലക്കുകൾ അള്ളാഹുവിന്റെ പെൺ മക്കളാണെന്നതിനും അവർക്ക് ഈ പേരുകളുണ്ടെന്നതിനും യാതൊരു തെളിവുമില്ല .വെറും ഊഹത്തിന്റെ അടിസ്ഥാനത്തിൽ മാത്രമാണിവർ ഇങ്ങനെ ചെയ്യുന്നത് .ഊഹമാകട്ടെ സത്യവുമായി ഒരു ബന്ധവുമില്ലാത്തതാണ് താനും.

ഇമാം റാസി(റ)എഴുതുന്നു. നാവിനെ നന്നായി സൂക്ഷിക്കണമെന്ന് ഈ സൂക്തം പഠിപ്പിക്കുന്നു മൂന്ന് കാര്യങ്ങൾ സൂക്ഷിക്കണമെന്ന് ഇവിടെ വ്യക്തമാവുന്നു(1)പ്രശംസ അർഹിക്കാത്തവരെ പ്രശംസിക്കൽ. ലാത്തയും ഉസ്സയും ദൈവങ്ങളാണെന്ന് അവർ പറഞ്ഞത് ഇതിനുദാഹരണം (2) ആക്ഷേപം അർഹിക്കാത്തവരെ ആക്ഷേപിക്കൽ അള്ളാഹുവിന്റെ ബഹുമാനികളായ അടിമകളെ ദൈവങ്ങളെന്ന് പറയുന്നത് സത്യത്തിൽ അവരെ ആക്ഷേപിക്കുന്നതിനു ഉദാഹരണമാണ് (3) അവസ്ഥ അറിയപ്പെടാത്തവരെ ആക്ഷേപിക്കൽ പാടില്ലെന്നും ഇത് തെളിയിക്കുന്നു (റാസി28/294)

  29.فَأَعْرِضْ عَن مَّن تَوَلَّى عَن ذِكْرِنَا وَلَمْ يُرِدْ إِلَّا الْحَيَاةَ الدُّنْيَا

(29)(നബിയേ)അത് കൊണ്ട് നമ്മുടെ സ്മരണ വിട്ട് തിരിഞ്ഞ് കളയുകയും ഐഹിക ജീവിതം മാത്രം ഉദ്ദേശിക്കുകയും ചെയ്യുന്നവരിൽ നിന്ന് തങ്ങൾ ഒഴിഞ്ഞ് നിൽക്കുക

30. ذَلِكَ مَبْلَغُهُم مِّنَ الْعِلْمِ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ وَهُوَ أَعْلَمُ بِمَنِ اهْتَدَى

(30)അവരുടെ അറിവിൽ നിന്നുള്ള ആകെത്തുകയാണത് .താങ്കളുടെ രക്ഷിതാവ് തന്നെയാണ് അവന്റെ മാർഗത്തിൽ നിന്ന് തെറ്റിപ്പോയവരെക്കുറിച്ച് ഏറ്റവും അറിയുന്നവൻ.നേർമാർഗം പ്രാപിച്ചവരെപ്പറ്റി കൂടുതൽ അറിയുന്നവനും അവൻ തന്ന.

അള്ളാഹുവിനെയും പരലോകത്തെയും കുറിച്ച് ഏത് പ്രവാചകൻ പ്രബോധനം ചെയ്യുമ്പോഴും ബഹു ദൈവ വാദികൾ അത് അവഗണിക്കുയായിരുന്നു.മക്കയിലെ ബഹുദൈവ വാദികളും അത് തന്നെ ചെയ്യുന്നു ഐഹിക ജീവിതം മാത്രം ചിന്തിച്ച് കഴിയുന്ന-പരലോക വിചാരം അശേഷം ഇല്ലാത്ത-ഇവരെ ഉപദേശിച്ചിട്ട് ഒരു ഫലവുമില്ല അതിനാൽ അവരെ തള്ളിക്കളയുവാൻ-അവഗണിക്കാൻ- അള്ളാഹു നിർദ്ദേശിക്കുകയാണിവിടെ.കാരണം അവരുടെ അറിവിന്റെ ആകെത്തുക ഈ ജീവിതവും അതിലെ സുഖ ഭോഗങ്ങളും മാത്രമാണ് അതിനപ്പുറമൊന്നും അവരുടെ മനസ്സിൽ കയറുകയില്ല അവരോട് ഉപദേശിച്ചിട്ട് പ്രയോജനവുമില്ല.നബി(സ)പ്രാർത്ഥനയിൽ ഇങ്ങനെ വന്നിരിക്കുന്നു

اللهم لاتجعل الدنيا أكبر همنا ولا مبلغ علمنا

“അള്ളാഹുവേ! ഇഹലോകത്തെ നീ ഞങ്ങളുടെ പ്രധാന വിചാരമാക്കരുതേ.ഞങ്ങളുടെ അറിവിന്റെ ആകെത്തുകയുമാക്കരുതേ”

നമ്മളും ഈ പ്രാർത്ഥന നടത്തേണ്ടതാണ്.കാരണം ഐഹിക ജീവിതത്തിൽ ഭ്രമിച്ചവർക്ക് അനന്തമായി വസിക്കേണ്ട പരലോകത്തെക്കുറിച്ചുള്ള ചിന്തയോ ആ ജീവിതം സന്താഷകരമാക്കാനായി ഇവിടെ സ്വീകരിക്കേണ്ട മുൻ കരുതലുകളെ കുറിച്ചുള്ള ചിന്തയോ ഉണ്ടാവുകയില്ല

ഇമാം റാസി(റ)എഴുതുന്നു. “നബി(സ)  ഹൃദയത്തിനു ചികിത്സിക്കുന്ന ഡോക്ടറാണ്.ചികിത്സയുടെ ക്രമമനുസരിച്ചാണ് ഡോക്ടർ ചികിത്സിക്കുക ഭക്ഷണത്തിലെ ക്രമീകരണം മതിയാവുന്നിടത്ത് മരുന്ന് നൽകില്ല.ചെറിയ മരുന്നു ഫലപ്രദമാവുന്നിടത്ത് ശക്തിയുള്ള മരുന്ന് നൽകില്ല.ശക്തമായ മരുന്നു ഫലിക്കുമെങ്കിൽ ഓപ്പറേഷനിലേക്ക് നീങ്ങുകയില്ല.ഇത് പോലെയാണ് നബി(സ)യുടെ പ്രബോധന ക്രമം.ആദ്യം അള്ളാഹുവിന്റെ ദിക് റിലേക്കും (ദിക് റ് മനസ്സിനു  സമാധാനം നൽകും)പിന്നീട് ചിന്തിക്കാൻ ഉദ്ബോധിപ്പിച്ചിട്ടുണ്ട്. പിന്നീട് താക്കീതുകൾ നൽകി ഇതൊന്നും ഫലിക്കാതെ വരുന്ന ഘട്ടത്തിലാണ് അവഗണിക്കാനുള്ള നിർദ്ദേശം നൽകിയത്(റാസി28/295)

31. وَلِلَّهِ مَا فِي السَّمَاوَاتِ وَمَا فِي الْأَرْضِ لِيَجْزِيَ الَّذِينَ أَسَاؤُوا بِمَا عَمِلُوا وَيَجْزِيَ الَّذِينَ أَحْسَنُوا بِالْحُسْنَى

(31)ആകാശ ഭൂമിയിലുള്ളതെല്ലാം അള്ളാഹുവിന്നുള്ളതാണ്.തിന്മ ചെയ്തവർക്ക് അവർ പ്രവർത്തിച്ചതനുസരിച്ച് പ്രതിഫലം നൽകുവാനും നന്മ ചെയ്തവർക്ക് ഏറ്റവും നല്ല പ്രതിഫലം (സ്വർഗ്ഗീയാനുഗ്രഹങ്ങൾ)നൽകുവാനും വേണ്ടിയത്രെ(സന്മാർഗികളിൽ നിന്ന് ദുർമാർഗികളെ അവൻ വേർതിരിച്ചത്)

മനുഷ്യന്റെ സൽ പ്രവർവർത്തനങ്ങൾ കൊണ്ട് അള്ളാഹുവിന്റെ അധികാരത്തിൽ വർധനവുണ്ടാക്കാനോ തിന്മ ചെയ്യുന്നത് കൊണ്ട് അള്ളാഹുവിനു എന്തെങ്കിലും പ്രയാസം വരാതിരിക്കാനോ അല്ല നന്നായി ജീവിക്കാൻ അള്ളാഹു മനുഷ്യനെ ഉത്ബോധിപ്പിക്കുന്നത്.കാരണം ആകാശ ഭൂമിയിലുള്ളതെല്ലാം അള്ളാഹുവിന്റെ പൂർണ്ണ നിയന്ത്രണത്തിലുള്ളതാണ്.നന്മ ചെയ്യുന്നത് സ്വന്തത്തിന്റെ സന്തോഷത്തിലേക്കും തിന്മ ചെയ്യുന്നവൻ സ്വന്തത്തിന്റെ നാശത്തിലേക്കും  സ്വയം എത്തുകയാണ്.ആകാശ ഭൂമിയുള്ളതിന്റെയെല്ലാം ഉടമസ്ഥനായ അള്ളാഹു ചീത്ത പ്രവർത്തനത്തിലേർപ്പെടുന്നവർക്ക് അതിന്റെ ശിക്ഷ നൽകാനും നല്ലത് ചെയ്യുന്നവർക്ക് വലിയ പ്രതിഫലം കൊടുക്കാനും തീരുമാനിച്ചത് ചിന്താ ശേഷിയുള്ളവർ ഉൾക്കൊള്ളുകയും നന്മയിൽ സജീവത പുലർത്താൻ ശ്രമിക്കുകയും ചെയ്യേണ്ടത് തന്നെ!.തിന്മ ചെയ്യുന്നവർക്ക് ചെയ്ത തിന്മയുടെ ശിക്ഷ മാത്രമേ നൽകുകയുള്ളൂവെന്നും അതേ സമയം നന്മ ചെയ്യുന്നവർക്ക് ഏറ്റവും നല്ല പ്രതിഫലം നൽകുമെന്നും പറഞ്ഞതിൽ നിന്ന് ചീത്തയുടെ മോശവും നന്മയുടെ മഹത്വവും തിരിച്ചറിയേണ്ടതാണ്.ഉത്തര വാദിത്വ ബോധത്തോടെ ജീവിക്കാനും രണ്ട് ലോകത്തും വിജയിക്കാനും അള്ളാഹു നമ്മെ തുണക്കട്ടെ ആമീൻ

 

32. الَّذِينَ يَجْتَنِبُونَ كَبَائِرَ الْإِثْمِ وَالْفَوَاحِشَ إِلَّا اللَّمَمَ إِنَّ رَبَّكَ وَاسِعُ الْمَغْفِرَةِ هُوَ أَعْلَمُ بِكُمْ إِذْ أَنشَأَكُم مِّنَ الْأَرْضِ وَإِذْ أَنتُمْ أَجِنَّةٌ فِي بُطُونِ أُمَّهَاتِكُمْ فَلَا تُزَكُّوا أَنفُسَكُمْ هُوَ أَعْلَمُ بِمَنِ اتَّقَى

(32) (നന്മ ചെയ്യുന്നവർ) വലിയ പാപങ്ങളും നീച വൃത്തികളും വിട്ട് അകന്ന് നിൽക്കുന്നവരാണ് പക്ഷെ നിസ്സാര തെറ്റുകൾ ഒഴികെ(അത് സംഭവിച്ചേക്കാം) താങ്കളുടെ രക്ഷിതാവ് പാപം പൊറുക്കുന്നതിൽ വിശാലത കാണിക്കുന്നവൻ തന്നെയാണ്. ഭൂമിയിൽ നിന്ന് നിങ്ങളെ സൃഷ്ടിച്ച  അവസരത്തിലും നിങ്ങൾ മാതാക്കളുടെ ഉദരങ്ങളിൽ ഗർഭസ്ഥ ശിശുക്കളായിരുന്നപ്പോഴും (എല്ലാം തന്നെ)നിങ്ങളെക്കുറിച്ച് അവൻ ഏറ്റവും അറിയുന്നവനാകുന്നു അത് കൊണ്ട് സ്വന്തത്തെ നിങ്ങൾ പരിശുദ്ധരാക്കി ഉയർത്തികാട്ടരുത്.ഭയ ഭക്തിയുള്ളവനെക്കുറിച്ച്  അവൻ ഏറ്റവും അറിയുന്നവനാകുന്നു

നന്മ ചെയ്യുന്നവരുടെ സ്വഭാവ ഗുണമാണ് ഈ സൂക്തത്തിന്റെ ആദ്യത്തിൽ പ്രസ്താവിച്ചിരിക്കുന്നത്  മനുഷ്യ സഹജമായ വല്ല നിസ്സാര തെറ്റുകുറ്റങ്ങളും അവരുടെ പക്കൽ നിന്ന് സംഭവിച്ചേക്കാമെന്നല്ലാതെ വലിയ കുറ്റങ്ങളോ നീച വൃത്തികളോ അവർ ചെയ്യുന്നതല്ല (അതിൽ നിന്നെല്ലാം അവർ ഒഴിഞ്ഞു നിൽക്കും) ശിക്ഷയെക്കുറിച്ച് പ്രത്യേകമായി താക്കീത് ചെയ്യപ്പെട്ട എല്ലാ കാര്യങ്ങളും വലിയ പാപങ്ങളിൽ പെടുന്നു.അതിൽ പെട്ട നികൃഷ്ട കാര്യങ്ങൾക്കാണ് നീചവൃത്തികൾ എന്ന് പറയുന്നത് പൊതുവിൽ വിരോധിക്കപ്പെട്ടതാണെങ്കിലും മനുഷ്യരിൽ സാധാരണ ഗതിയിൽ  സഭവിച്ചേക്കാവുന്ന നിസ്സാര തെറ്റുകളാണ്  ‘ലമം‘ എന്ന് പറഞ്ഞത്. വലിയ കുറ്റങ്ങളിൽ നിന്ന് ഒഴിഞ്ഞു നിൽക്കുന്നവരിൽ വന്നേക്കാവുന്ന ചെറുകുറ്റങ്ങൾ അവരുടെ സൽകർമങ്ങൾ മുഖേനയും മറ്റും അള്ളാഹു പൊറുത്തു കൊടുക്കും എന്ന് സാരം.ഈ ആശയം  സൂറത്തു ന്നി സാ അ് 31 മത് വാക്യത്തിൽ അള്ളാഹു പറയുന്നു

ان تجتنبوا كبائر ماتنهون عنه نكفر عنكم سيئاتكم وندخلكم مدخلا كريما

നിങ്ങളോട് വിരോധിക്കപ്പെടുന്ന വൻ പാപങ്ങൾ നിങ്ങൾ വർജ്ജിക്കുന്ന പക്ഷം  നിങ്ങളുടെ തിന്മകളെ നിങ്ങളിൽ നിന്ന് നാം മായ്ച്ചു കളയും.മാന്യമായ ഒരു സ്ഥാനത്ത് നിങ്ങളെ നാം പ്രവേശിപ്പിക്കുകയും ചെയ്യും)

ഇമാം ഖുർത്വുബി(റ) എഴുതുന്നു. “വലിയ പാപം എന്ന് പറഞ്ഞത് ശിർക്ക് ആണ്.നീച വൃത്തി എന്നത് വ്യഭിചാരവും. ഇബ്നു അബ്ബാസ്(റ)ന്റെ വ്യാഖ്യാനമാണിത്.നരകത്തിലെത്തിക്കുന്ന എല്ലാ കുറ്റവുമാണ് വൻ പാപം. ഇസ്ലാമിക് കോടതിയിൽ ശിക്ഷ ലഭിക്കാവുന്ന എല്ലാ തെറ്റുകളും നീച വൃത്തിയും“ മുഖാതിൽ(റ) എന്നവരുടെ വ്യാഖ്യാനമാണിത്. പാപമാണെങ്കിലും നേരത്തെ പറഞ്ഞ ഇനത്തിൽ വരാത്തതും പലപ്പോഴും സഭവിച്ചേക്കാവുന്നതുമാണ് ‘ലമം‘ എന്ന് പറഞ്ഞത് പറ്റിപ്പോയ തെറ്റിൽ ഉടനെ തന്നെ പശ്ചാത്തപിക്കുകയും പിന്നീട് ആ തെറ്റിലേക്ക് മടങ്ങാതിരിക്കുകയും ചെയ്യുന്നതിനാണ് ‘ലമം‘ എന്ന് പറയുക എന്ന വ്യാഖ്യാനം മുജാഹിദ്(റ) ഹസൻ(റ) എന്നിവർക്കുണ്ട്  താങ്കളുടെ രക്ഷിതാവ് പാപം പൊറുക്കുന്നതിൽ വിശാലത കാണിക്കുന്നവൻ തന്നെയാണ് എന്ന ഭാഗം ഇതിലേക്കാണ് സൂചന നൽകുന്നത്  (ഖുർത്വുബി 9/79)

അള്ളാഹു പാപം പൊറുക്കുന്നതിൽ വിശാലത കാണിക്കുന്നവനാണ് എന്ന ഭാഗം സവിശേഷ ശ്രദ്ധയാകർഷിക്കേണ്ട പരാമർശമാണ്.തെറ്റു ചെയ്തു പോയവർക്കുള്ള ഒരു ആശ്വാസ വചനമാണത്.കാരണം സാഹചര്യത്തിന്റെ സമ്മർധത്താലാണ് പലരും ആദ്യമാദ്യം തിന്മകളിൽ ചെന്ന് പെടുന്നത്.തെറ്റിന്റെ ചെളിക്കുണ്ടിൽ വീണു പോയ എനിക്ക് ഇനി ഒരു രക്ഷയുമില്ല എന്ന നിരാശയാണ് പലരെയും പിന്നീട് ആ തെറ്റിൽ തന്നെ മുഴുകാനും കുറ്റങ്ങളുടെ കൂട്ടുകാരനാവാനും പ്രേരിപ്പിക്കുന്നത്.എന്റെ ദോഷം പൊറുപ്പിക്കാനും  ശേഷം നല്ലവനായി ജീവിക്കാനും ഒരു അവസരമുണ്ടെന്ന തിരിച്ചറിവ് പലരേയും നല്ല ജീവിതത്തിലേക്ക് തിരിച്ചെത്തിക്കുമെന്ന കാര്യം ഉറപ്പാണ്

‘തെറ്റു ചെയ്ത് ശരീരത്തോട് അതിക്രമം കാണിച്ച അടിമകളേ!നിങ്ങൾ അള്ളാഹുവിന്റെ അനുഗ്രഹത്തെ തൊട്ട് നിരാശരാകരുത്.അള്ളാഹു എല്ലാ ദോഷങ്ങളും പൊറുക്കുമെന്ന ..”
സൂറത്തുസ്സുമർ 53 മത് സൂക്തം ഈ ആശയം കൂടുതൽ വ്യക്തമാക്കുന്നതാണ്. നൂറു പേരെ കൊലപ്പെടുത്തിയ ഒരു മനുഷ്യൻ പശ്ചാത്തപിച്ചപ്പോൾ അവനെ പോലും അള്ളാഹു സ്വീകരിച്ചു എന്ന് അറിയിക്കുന്ന നബി വചനവും (ബുഖാരി)  മനുഷ്യൻ തെറ്റു ചെയ്യുമെന്നും തെറ്റു ചെയ്യുന്നവരിൽ ഉത്തമൻ പശ്ചാത്തപിക്കുന്നവനാണെന്നുമുള്ള നബി വചനവും (ബൈഹഖി/തുർമുദി)
 നന്നാവാൻ ചിന്തിക്കുന്നവർക്ക് സന്തോഷം നൽകുന്ന സന്ദേശം തന്നെ!

“ഭൂമിയിൽ നിന്ന് നിങ്ങളെ സൃഷ്ടിച്ച അവസരത്തിലും നിങ്ങൾ മാതാക്കളുടെ ഉദരങ്ങളിൽ ഗർഭസ്ഥ ശിശുക്കളായിരുന്നപ്പോഴും നിങ്ങളെക്കുറിച്ച് അവൻ ഏറ്റവും അറിയുന്നവനാണെന്ന“  ഭാഗം ധാരാളം തെറ്റായ ധാരണകൾക്കുള്ള മറുപടിയാണ്,
ഇമാം റാസി (റ) എഴുതുന്നു “ചില അവിശ്വാസികൾ പറഞ്ഞു .ഞങ്ങൾ രാത്രിയുടെ ഇരുട്ടിലും വീടിന്റെ  സ്വകാര്യതയിലും ചെയ്യുന്ന പ്രവൃത്തികൾ അള്ളാഹു എങ്ങനെ അറിയാനാണ്?. അതിന്റെ മറുപടിയാണിത്.നിങ്ങൾ ഇപ്പോൾ ചെയ്യുന്നവ മാത്രമല്ല മാതാവിന്റെ ഗർഭ പാത്രത്തിൽ കിടക്കുന്ന സമയത്തെ പോലും നിയന്ത്രിക്കുന്നത് അള്ളാഹുവാണ്. അതിനാൽ അവൻ അറിയാത്ത ഒരു അവസ്ഥയും നിങ്ങൾക്കില്ല മറ്റൊന്നു കൂടി അവർ ചോദിക്കുന്നു ഞങ്ങളുടെ പ്രവർത്തനങ്ങൾക്ക് പ്രതിഫലം തരണമെങ്കിൽ മരണ ശേഷം പുനർജന്മം നടക്കേണ്ടതുണ്ടല്ലോ എന്നാൽ മണ്ണിൽ അലിഞ്ഞു ചേർന്ന ശരീര ഭാഗങ്ങൾ ഓരോരുത്തരുടെതും തെറ്റാതെ സംവിധാനിക്കാൻ സാദ്ധ്യമല്ല അതിനാൽ പുനർജന്മവും പ്രതിഫല സംവിധാനവും അസംഭവ്യമാണ്.ഇതിന്റെ മറുപടി കൂടിയാണിത്.ശൂന്യതയിൽ നിന്ന് നിങ്ങൾക്ക് ജന്മം തന്ന അള്ളാഹുവിനു നിങ്ങൾ എവിടെ പോയാലും നിങ്ങളെ കണ്ടെത്തുക എന്നത് പ്രയാസമല്ല.കാരണം അവന്റെ നിങ്ങളെക്കുറിച്ചുള്ള അറിവ് നിങ്ങളെ പിന്തുടർന്നു കൊണ്ടേയിരിക്കുന്നുണ്ട്(റാസി 29/10)

ആ നാഥൻ എന്റെ പ്രവർത്തനങ്ങൾ നിരീക്ഷിക്കുന്നുവെന്ന ബോധം എത്ര സ്വകാര്യതയിലും നമ്മുടെ ജീവിതം കുറ്റമറ്റതും ലക്ഷ്യ ബോധത്തിലധിഷ്ഠിതവുമാക്കാൻ മനുഷ്യനെ പ്രേരിപ്പിക്കേണ്ടതാണ്       
ആള്ളാഹു മനുഷ്യന്റെ ഓരോഘട്ടവും നിയന്ത്രിക്കുകയും അവനെ വിശദമായി അറിയുന്നവനുമാണ് അത് കൊണ്ട് സ്വന്തം നന്മകൾ എടുത്തു കാട്ടി ആത്മ പ്രശംസ ചെയ്യരുത്.നിങ്ങളുടെ വലിപ്പവും മഹത്വവും എത്രയുണ്ടെന്ന് അള്ളാഹുവിനു നല്ല പോലെ അറിയും.ഭക്തിയുടെ വർദ്ധനവാണ് മഹത്വത്തിന്റെ മാനദണ്ഡം.മറ്റേത് കാര്യവും പോലെ ഓരോരുത്തരിലും അത് എത്ര അളവിലുണ്ടെന്ന് അള്ളാഹുവിനു നന്നായി അറിയാം

ഇമാം ഇബ്നു കസീറർ (റ) എഴുതുന്നു..“നിങ്ങൾ സ്വന്തത്തെ പരിശുദ്ധരാക്കി പൊക്കികാട്ടരുതെ എന്ന് പറഞ്ഞതിന്റെ അർത്ഥം സ്വന്തത്തെ നിങ്ങൾ പ്രശംസിക്കരുത്.നിങ്ങളുടെ പ്രവർത്തനങ്ങളുടെ പേരിൽ പൊങ്ങച്ചം നടിക്കുകയുമരുത്.(കാരണം നമ്മുടെ പ്രവർത്തനങ്ങൾ ആത്യന്തികമായി സ്വീകാര്യമാണൊ, എന്ന് അള്ളാ‍ഹുവിനു മാത്രമേ അറിയൂ) മുഖസ്തുതി പറയുന്നതും ശരിയല്ല.നബി(സ)യുടെ സന്നിധിയിൽ വെച്ച് ഒരാൾ മറ്റൊരാളെ പ്രശംസിച്ചപ്പോൾ നബി(സ)പറഞ്ഞു.താങ്കൾ താങ്കളുടെ സഹോദരന്റെ പിരടി മുറിച്ചു. പ്രശംസിച്ചേ പറ്റൂ എന്നുണ്ടെങ്കിൽ ഞാൻ അദ്ദേഹത്തെക്കുറിച്ച് അങ്ങനെ വിചാരിക്കുന്നു.(അള്ളാഹുവാണ് യാഥാർത്ഥ്യം അറിയുന്നവൻ) എന്നേ പറയാവൂ. മുഖസ്തുതി പറയുന്നവന്റെ മുഖത്ത് മണ്ണ് വാരിയിടണമെന്ന് നബി(സ) നിർദ്ദേശിച്ചിട്ടുണ്ട് ഇമാം മുസ്ലിം (റ) റിപ്പോർട്ട് ചെയ്ത ഹദീസിൽ ഇക്കാര്യം വന്നിട്ടുണ്ട് (ഇബ്നു കസീർ 4/374)

മുഖസ്തുതിയുടെ അപകടമാണ് നബി(സ) ഉണർത്തിയത്.കാരണം ഒരാൾ മറ്റൊരാളെ പ്രശംസിക്കുമ്പോൾ ദുർബല ഹൃദയനായ മനുഷ്യന്റെ മനസ്സിൽ തന്നെക്കുറിച്ച് ചിലപ്പോൾ മതിപ്പ് തോന്നുകയും ആ അഹങ്കാരം തന്റെ ആത്മീയ നാശത്തിലേക്ക് എത്തിക്കുകയും ചെയ്തേക്കാം.അള്ളാഹു നമ്മെ കാത്തു രക്ഷിക്കട്ടെ ആമീൻ

33. أَفَرَأَيْتَ الَّذِي تَوَلَّى

(33) എന്നാൽ (നബിയേ )പിന്തിരിഞ്ഞു കളഞ്ഞ ഒരുവനെ താങ്കൾ കണ്ടുവോ?

മുപ്പത്തി മൂന്ന് മുതൽ ഏതാനും വാക്യങ്ങളുടെ അവതരണ പശ്ചാത്തലം ചില വ്യാഖ്യാതാക്കൾ ഇങ്ങനെ വിവരിക്കുന്നു
“വലീദ്ബ്നു മുഗീറ:എന്ന ഖുറൈശി പ്രമുഖൻ നബി(സ)യുടെ അടുത്ത് ഇരുന്നു നബി(സ)യുടെ ഉപദേശങ്ങൾ കേട്ടു നബി(സ)യുടെ ഉപദേശങ്ങൾ വലീദുബ്നു മുഗീറ:യുടെ ഹൃദയത്തിൽ ശക്തിയായി പതിഞ്ഞു ഖുർആനിനെ അവൻ പ്രശംസിച്ചു  അങ്ങനെയിരിക്കെ മുശ് രിക്കുകളിൽ ഒരാൾ അയാളെ പരിഹസിക്കുകയും പാരമ്പര്യ മതം ഉപേക്ഷിക്കുന്നതിൽ അയാളെ ആക്ഷേപിക്കുകയും ചെയ്തു.അപ്പോൾ താൻ പരലോക ശിക്ഷയെ ഭയപ്പെടുന്നുവെന്ന് വലീദ് പറഞ്ഞു.ഒരു നിശ്ചിത സംഖ്യ തന്നാൽ നിന്റെ ശിക്ഷ പരലോകത്ത് ഞാൻ ഏറ്റെടുക്കാമെന്നായി ആ മുശ് രിക്ക്! വലീദ് അത് സമ്മതിക്കുകയും ഇസ് ലാമിനോട് തോന്നിയ അനുഭാവം ഉപേക്ഷിക്കുകയും ചെയ്തു .പക്ഷെ മറ്റെയാൾക്ക് തന്റെ പിശുക്ക് മൂലം പറഞ്ഞ സംഖ്യ മുഴുവൻ നൽകാതെ വാഗ്ദാന ലംഘനം നടത്തി (റാസി(റ) /ഖുർത്വുബി /ബൈളാവി)

34. وَأَعْطَى قَلِيلًا وَأَكْدَى

(34)അവൻ അല്പം കൊടുക്കുകയും പിന്നെ നിർത്തിക്കളയുകയും ചെയ്തു

ആ മുശ് രിക്ക് തന്റെ ശിക്ഷ പര ലോകത്ത് ഏറ്റ് വാങ്ങാനായി വ്യവസ്ഥ ചെയ്ത സംഖ്യ അല്പം നൽകിയെങ്കിലും തന്റെ പിശുക്ക് കാരണം ബാക്കി നൽകിയില്ല ഇമാം റാസി(റ) എഴുതുന്നു

“ഇവൻ ബാക്കി നൽകാത്തതിനെ ആക്ഷേപിക്കേണ്ടതില്ലല്ലോ കാരണം ആ പൈസ വാങ്ങിയ ആൾ അത് വാങ്ങാൻ അർഹനല്ലല്ലോ? ആ സ്ഥിതിക്ക് ബാക്കി നൽകാത്തതിനെ ആക്ഷേപിക്കുന്നത് എന്തിന്? അല്പം നൽകിയത് പോലും അനർഹമായ നിലക്കായതിനാൽ അതിനെയല്ലേ ആക്ഷേപിക്കേണ്ടത്? മറുപടി ഇങ്ങനെയാണ്. ബുദ്ധിപരമായും സാമ്പ്രദായികമായും ഇവൻ ആക്ഷേപാർഹനാണ്. കാരണം വലീദ് പൈസ നൽകാമെന്നേറ്റത് തന്റെ പരലോക ശിക്ഷ മറ്റയാൾ ഏറ്റെടുക്കാനാണല്ലോ അതിനു വേണ്ട മുൻ കരുതൽ എടുക്കേണ്ട സമയത്ത് പിശുക്ക് മൂലം പണം നൽകാതിരിക്കുന്നത് ശരിയല്ലല്ലോ! ഇതാണ് ബുദ്ധിപരമായ ന്യായം.സാമ്പ്രദായികമായി അറബികളുടെ സ്വഭാവം വാഗ്ദാനം പാലിക്കലാണ് എന്നാൽ വലീദ് വാഗ്ദാന ലംഘനം നടത്തി.അത് അറബികളുടെ സമ്പ്രദായത്തിനെതിരാണ്.അതാണീ ആക്ഷേപത്തിന്റെ ന്യായം(റാസി29/12)

35. أَعِندَهُ عِلْمُ الْغَيْبِ فَهُوَ يَرَى

(35)അവന്റെ അടുത്ത് വല്ല അദൃശ്യ ജ്ഞാനവുമുണ്ടായിട്ട് (അത് വഴി)അവൻ കണ്ടറിയുന്നുണ്ടോ?

തന്റെ ശിക്ഷ മറ്റൊരാൾ ഏറ്റെടുക്കുമെന്ന് മുൻ വേദ ഗ്രന്ഥങ്ങളിലൊന്നുമില്ലാത്ത വല്ല അദൃശ്യജ്ഞാനവും ഇവനു ലഭിച്ചിട്ടുണ്ടോ? അത് കൊണ്ടാണോ ഈ വാഗ്ദാനത്തിൽ നിന്ന് അവൻ പുറകോട്ട് പോയത്? നബി(സ) യെ വിശ്വസിക്കേണ്ടതില്ല. തന്റെ രക്ഷക്ക് വേറെയും മാർഗ്ഗങ്ങളുണ്ടെന്ന വല്ല അദൃശ്യ അറിവും ഇവനു ലഭിച്ചത് കൊണ്ടാണോ നബി (സ) യെ സ്വീകരിക്കുമെന്ന നിലാപാടിനു ശേഷം അവൻ അതിൽ നിന്ന് പിന്മാറിയത് എന്നും ഈ ചോദ്യത്തിന്റെ സാരാംശത്തിൽ ഉൾപ്പെടാം

36. أَمْ لَمْ يُنَبَّأْ بِمَا فِي صُحُفِ مُوسَى

(36)അഥവാ മൂസാ(അ)ന്റെ ഏടുകളിൽ ഉള്ളതിനെ പറ്റി അവന് അറിവ് ലഭിച്ചിട്ടില്ലേ?

അള്ളാഹുവിന്റെ ഏകത്വം,പുനർജ്ജന്മം പരലോക ജീവിതം രക്ഷാ ശിക്ഷകൾ തുടങ്ങിയ കാര്യങ്ങളെല്ലാം മൂസാ നബിക്ക് നൽകപ്പെട്ട ഏടുകളിൽ ഉണ്ട്.അതനുസരിച്ച് പ്രവൃത്തിക്കുകയാണെങ്കിൽ ഇവൻ ചെയ്തത് പോലുള്ള വിവരക്കേട് ചെയ്യില്ലെന്ന് സാരം

37. وَإِبْرَاهِيمَ الَّذِي وَفَّى

(37) (ബാധ്യതകൾ) നിറവേറ്റിയ ഇബ് റാഹീം (അ) ന്റെ (ഏടുകളിൽ ഉള്ളതിനെപ്പറ്റി) യും

ഇബ് റാഹീം നബി (അ) ക്കു നൽകപ്പെട്ട സന്ദേശങ്ങളിലും ഇത്തരം കാര്യങ്ങളുണ്ട്.ഇബ് റാഹീം നബി (അ) നെ ബാധ്യതകൾ നിറവേറ്റിയ ആൾ എന്ന് പരിചയപ്പെടുത്തിയതിനെക്കുറിച്ച് ഇമാം ബൈളാവി (റ) എഴുതുന്നു “തന്നോട് കല്പിക്കപ്പെട്ടതും താൻ ഏറ്റെടുത്തതുമെല്ലാം പൂർണ്ണമായി നിറവേറ്റിയ വരാണ് ഇബ് റാഹീം (അ).മറ്റ് നബിമാരും ഇങ്ങനെ തന്നെയാണെങ്കിലും മറ്റ് പലരും സഹിക്കേണ്ടി വന്നിട്ടില്ലാത്ത പ്രയാസങ്ങൾ താൻ സഹിച്ചത് കൊണ്ടാണ് ഈ വിശേഷണം ഉണ്ടായത്. നംറൂദിന്റെ തീയിലെറിയപ്പെട്ട സമയത്ത് ജിബ് രീൽ (അ) തന്റെ സമീപത്ത് വന്ന് വല്ല സഹായവും ആവശ്യമുണ്ടോ എന്ന് ചോദിച്ചപ്പോൾ നിങ്ങളിലേക്ക് ആവശ്യമില്ലെന്ന് പറഞ്ഞതും“ സ്വന്തം മകനെ അറുക്കാൻ അള്ളാഹുവിന്റെ നിർദ്ദേശ പ്രകാരം തീരുമാനിച്ചതും അതിഥിയെ സൽക്കരിക്കാൻ ബഹുദൂരം നടന്നു അന്വേഷിക്കുകയും ആരെയും കിട്ടാത്ത ദിവസം എനിക്കും സുന്നത്ത് നോമ്പാണെന്ന് പ്രഖ്യാപിക്കുകയും ചെയ്യുന്നത് അടക്കം ഈ സവിശേഷതക്ക് തെളിവാണ്.ഇബ്റാഹീം നബിക്ക് ശേഷമാണ് മൂസാ (അ) വന്നത് എന്നിരിക്കെ ആദ്യം മൂസാ നബിയുടെ ഏടിനെ പരാമർശിച്ചത് അവർക്കത്  കൂടുതൽ പരിചിതമായത് കൊണ്ടാണ് (ബൈളാവി 2/442) 

38. أَلَّا تَزِرُ وَازِرَةٌ وِزْرَ أُخْرَى

(38) അതായത് കുറ്റം വഹിക്കുന്ന ഒരാളും മറ്റൊരാളുടെ കുറ്റം  വഹിക്കുക ഇല്ല എന്ന്

ഈ പ്രവാചകന്മാരുടെ ഗ്രന്ഥങ്ങളിലെല്ലാം സ്ഥാപിച്ചിരിക്കുന്ന ഒരു തത്വമാണ് ഒരാൾക്ക് മറ്റൊരാളുടെ കുറ്റങ്ങൾ ഏറ്റെടുക്കാനാവില്ല എന്ന്.(പിന്നെ എങ്ങനെയാണ് നിന്റെ കുറ്റം ഞാൻ ഏറ്റെടുക്കാമെന്ന് ആ മുശ് രിക്ക് പറഞ്ഞതും ആ ഉറപ്പിന്മേൽ വലീദ് ഇസ് ലാം കയ്യൊഴിച്ചതും എന്ന് സാരം)

39. وَأَن لَّيْسَ لِلْإِنسَانِ إِلَّا مَا سَعَى

(39)മനുഷ്യന് അവൻ പ്രവർത്തിച്ചതല്ലാതെ മറ്റൊന്നും ഇല്ല  എന്നും

മറ്റുള്ളവരുടെ കുറ്റം ഏറ്റെടുക്കാനാവില്ല എന്ന് പറയുന്നത് പോലെ തന്നെ മറ്റൊരാളുടെ പ്രവർത്തനത്തിന്റെ പ്രതിഫലവും വേറൊരാൾക്ക് അവകാശപ്പെട്ടതല്ല എന്നും ആ ഗ്രന്ഥങ്ങളിലുണ്ട് മനുഷ്യനു അവൻ പ്രവർത്തിച്ചതല്ലാതെ മറ്റൊന്നുമില്ലെന്ന് പറഞ്ഞാൽ മറ്റൊന്നും അവനു അവകാശപ്പെടാൻ കഴിയില്ല എന്നാണ്.അല്ലാതെ ആരെങ്കിലും ഔദാര്യമായി നൽകിയാൽ ലഭിക്കില്ല എന്നല്ല. ഇമാം ഖുർത്വുബി (റ) എഴുതുന്നു  ‘ലിൽ ഇൻസാനി‘  എന്നിടത്തെ ‘ലാം‘, എന്ന അവ്യയം അറബി ഭാഷയിൽ ഉടമാവകാശം എന്നതിനെ സൂചിപ്പിക്കുന്നതാണ് അഥവാ താൻ ചെയ്തതേ തനിക്ക് അവകാശപ്പെടാനാവൂ.എന്നാൽ തനിക്ക് വേണ്ടി മറ്റാരെങ്കിലും വല്ലതും ധർമ്മം ചെയ്താൽ (അവർ ചെയ്ത സുകൃതങ്ങളുടെ പ്രതിഫലം ഉൾപ്പെടെ) അത് ഇവനു അവകാശപ്പെട്ടതല്ലെങ്കിലും അള്ളാഹു അവന്റെ ഔദാര്യമായി നൽകും.ഒരു സുകൃതവും ചെയ്യാത്ത കുട്ടികളെ അള്ളാഹു അവന്റെ ഔദാര്യമായി സ്വർഗത്തിൽ പ്രവേശിപ്പിക്കുന്നത് പോലെ തന്നെ. മറ്റൊരു വ്യാഖ്യാനം ഇനി പറയുന്നതാണ്
മനുഷ്യനു താൻ ചെയ്തത് മാത്രമേ ലഭിക്കൂ എന്നത് അവിശ്വാസിയെക്കുറിച്ചാണ് അവനു മറ്റാരെങ്കിലും നന്മ ചെയ്തതിന്റെ പ്രതിഫലം അവർ നൽകിയാലും ലഭിക്കില്ല (കാരണം അവിശ്വാസിക്ക് താൻ ചെയ്ത നന്മ പോലും പരലോകത്ത് ഉപകരിക്കില്ല എന്നാണല്ലോ ഖുർആൻ പറയുന്നത്) അതെ സമയം മുസ് ലിമിനു അത് ബാധകമല്ല അവൻ ചെയ്തതും അവനു വേണ്ടി ചെയ്തതും അവനു ലഭിക്കുമെന്ന് തന്നെയാണ് ശരി ഇതാണ് റബീഉബ്നു അനസ് (റ) നിരീക്ഷിച്ചത് (ഖുർത്വുബി 17/85)

മരണപ്പെട്ടവർക്ക് ജീവിച്ചിരിക്കുന്നവർ ഒന്നും ചെയ്തിട്ട് കാര്യമില്ലെന്ന് പറഞ്ഞാൽ മരണപ്പെട്ടവർക്ക് വേണ്ടി ജീവിച്ചിരിക്കുന്നവർ മയ്യിത്ത് നിസ്ക്കരിക്കുന്നത് പോലും വെറുതെയാണെന്ന് പറയേണ്ടി വരില്ലേ? എന്നാൽ മയ്യിത്തിനു വേണ്ടി നിസ്ക്കരിക്കുന്നത് കൊണ്ട് ആ മയ്യിത്തിനു വലിയ ഉപകാരം ലഭിക്കുമെന്ന് നബി(സ) ധാരാളം ഹദീസുകളിൽ പഠിപ്പിച്ചിട്ടുണ്ട്. സഅ്ദ് (റ) തന്റെ ഉമ്മ മരണപ്പെട്ടപ്പോൾ നബി(സ)യോട് ഉമ്മക്ക് വേണ്ടി ഞാൻ വല്ലതും ചെയ്തിട്ടു കാര്യമുണ്ടോ എന്ന് അന്വേഷിച്ചപ്പോൾ ഉപകരിക്കും എന്ന് നബി(സ) പറയുകയും ജനങ്ങൾക്ക് അത്യാവശ്യമുള്ള ഒരു സ്ഥലത്ത് ശുദ്ധ ജലത്തിനു വേണ്ടി ഒരു കിണർ കുഴിക്കുകയും ഇത് സഅ്ദിന്റെ ഉമ്മാക്ക്(പ്രതിഫലം കിട്ടാൻ) വേണ്ടിയുള്ളതാണെന്ന് പറയുകയും ചെയ്തത് ഹദീസിലുണ്ട്.. (അബൂ ദാവൂദ് ) അബൂസലമ: (റ)മരണപ്പെട്ടപ്പോൾ നബി(സ) അവിടെ എത്തുകയും ‘അബൂസലമക്ക് പൊറുക്കണേ‘ എന്ന് പ്രാർത്ഥിക്കുകയും ചെയ്തതും ഹദീസിലുണ്ട്. (മുസ് ലിം) മയ്യിത്തിന്റെ അടുത്തും മരണാസന്നനായ വ്യക്തിയുടെ അടുത്തും നല്ല വാക്കുകൾ പറയണമെന്ന് നബി(സ) പഠിപ്പിച്ചിട്ടുണ്ട്. (മുസ് ലിം) മരണാസന്നരുടെ അടുത്ത്/ മരണപ്പെട്ടവരുടെ അടുത്ത് യാസീൻ പാരായണം ചെയ്യാനും ഹദീസിൽ നിർദ്ദേശം വന്നിട്ടുണ്ട്. (അബൂദാവൂദ്)
അതിനാൽ മനുഷ്യനു അവൻ ചെയ്തതേ ലഭിക്കൂ എന്ന ഈ സൂക്തത്തിന്റെ വ്യാഖ്യാനം നാം പറഞ്ഞത് പോലെ അവൻ ചെയ്തതേ അവനു അവകാശപ്പെടാൻ സാധിക്കുകയുള്ളൂ (മറ്റുള്ളവർ ചെയ്യുന്നതും ചെയ്യാതിരിക്കുന്നതും അവരുടെ ഇഷ്ടമാണല്ലോ) എന്നു മാത്രമാണ്.മറ്റുള്ളവരുടെ പ്രാർത്ഥനയോ ദാന ധർമ്മങ്ങളോ ലഭിക്കില്ലെന്നല്ല അത് അവകാശപ്പെടാൻ സാധിക്കില്ല എന്ന് മാത്രമാണ് എന്നും വ്യക്തം.

എന്നാൽ ഇവിടെ പ്രസക്തമായ ഒരു സംശയം ഉണ്ടാവാം ഈ സൂക്തത്തിന്റെ വ്യാഖ്യാനത്തിൽ ഇമാം ഇബ്നു കസീർ(റ) എഴുതുന്നു.ഈ മഹത്തായ സൂക്തത്തിൽ നിന്ന് ഇമാം ശാഫി ഈ (റ) വും ശിഷ്യന്മാരും ഗവേഷണം ചെയ്തിരിക്കുന്നത് ഖുർആൻ പാരായണത്തിന്റെ പ്രതിഫലം മരണപ്പെട്ടവരിലേക്ക് എത്തുകയില്ല കാരണം അത് അവരുടെ പ്രവൃത്തനത്തിലും അദ്ധ്വാനത്തിലും പെട്ടതല്ല.നബി(സ)യുടെയോ അനുചരരുടെയോ പ്രേരണയും ഈ വിഷയത്തിനില്ല.ഇത്തരം വിഷയത്തിൽ തെളിവുകൾ വന്നതിൽ നിൽക്കണം താരതമ്യം(ഖിയാസ്) പറ്റില്ല. എന്നാൽ ദാന ധർമ്മത്തിന്റെയും ദുആയുടെയും പ്രതിഫലം മയ്യിത്തിനു ലഭിക്കുമെന്നത് അവിതർക്കിതമായ കാര്യമാണ് (ഇബ്നു കസീർ 4/376) എന്നിങ്ങനെയാണ് ആ പ്രസ്താവന.
മരണപ്പെട്ടവർക്ക് വേണ്ടി ഖുർആൻ പാരായണം ചെയ്യുന്നത് പാടില്ലെന്നാണ് ശാഫി ഈ (റ) ന്റെ വീക്ഷണം എന്ന് വരുത്തിത്തീർക്കാൻ മയ്യിത്തിനു വേണ്ടിയുള്ള ഖുർആൻ പാരായണ വിരോധികൾ സാധാരണ ഈ ഭാഗം ദുരുപയോഗം ചെയ്യുന്നുണ്ട്.എന്നാൽ ഇതിന്റെ സത്യാവസ്ഥ എന്താണ്? ഖുർആൻ പാരായണത്തിന്റെ പ്രതിഫലം മയ്യിത്തിനു ലഭിക്കില്ല എന്ന ഇതുമായി ബന്ധപ്പെട്ട ഉദ്ധരണി പറഞ്ഞ ശേഷം മഹാനായ ശൈഖ് സൈനുദ്ദീൻ മഖ്ദൂം (റ) തന്റെ ഫത് ഹുൽ മുഈനിൽ പറയുന്നു,,

وحمل جمع عدم الوصول الذي قاله النووي علي ما اذا قرأ لابحضرة الميت ولم ينو القارئ ثواب قراءته

 

له أونواه ولم يدع وقد نص الشافعي والأصحاب علي ندب قراءة ماتيسر عند الميت والدعاء عقبها أي

 لأنه حينئذ أرجي للاجابة ولأن الميت تناله بركة القراءة كالحي الحاضر

മയ്യിത്തിന്റെ സമീപത്ത് നിന്നല്ലാതെ ഖുർആൻ പാരായണം നടത്തുകയും അതിന്റെ പ്രതിഫലം മയ്യിത്തിനു ലഭിക്കണമെന്ന് പാരായണം ചെയ്യുന്നവൻ കരുതാതിരിക്കുകയോ അല്ലെങ്കിൽ അങ്ങനെ കരുതി പ്രാർത്ഥിക്കാതിരിക്കുകയോ ചെയ്താൽ അതിന്റെ പ്രതിഫലം മയ്യിത്തിനു് എത്തുകയില്ലെന്നാണ് ഇമാം നവവി(റ) പറഞ്ഞതിന്റെ ഉദ്ദേശ്യമെന്ന് ഒരു സംഘം പണ്ഡിതന്മാർ വ്യാഖ്യാനിച്ചിരിക്കുന്നു. കാരണം  മയ്യിത്തിന്റെ സമീപത്ത് സാധിക്കുന്നത്ര ഖുർആൻ പാരായണം ചെയ്യലും അതിന്റെ ഉടനെ തന്നെ പ്രാർത്ഥിക്കലും സുന്നത്താണെന്ന് ഇമാം ശാഫി ഈ(റ) വും അനുയായികളും വ്യക്തമാക്കിയിരിക്കുന്നു കാരണം ഖുർആൻ പാരായണം ചെയ്ത ഉടനെയുള്ള പ്രാർത്ഥന ഉത്തരം ലഭിക്കാൻ കൂടുതൽ സാധ്യത പ്രതീക്ഷിക്കുന്ന സമയമാണ് മയ്യിത്തിനു ഖുർആൻ പാരായണത്തിന്റെ പുണ്യം എത്തുകയും ചെയ്യും അവിടെ സന്നിഹിതരായ ജീവിച്ചിരിക്കുന്നവർക്കെന്ന പോലെ (ഫത് ഹുൽ മുഈൻ വസ്വിയ്യത്തിന്റെ അദ്ധ്യായം)

ശാഫി ഈ മദ് ഹബിലെ പ്രസിദ്ധമായ അഭിപ്രായം മയ്യിത്തിനു ഖുർആൻ പാരായണത്തിന്റെ കൂലി ലഭിക്കില്ല അതിനാൽ പാരായണം പാടില്ല  എന്ന് ഇമാം നവവി (റ) തന്റെ ശർഹ് മുസ് ലിമിൽ പറഞ്ഞതായാണ് പലരും തെറ്റിദ്ധരിപ്പിക്കുന്നത്.എന്നാൽ അതിന്റെ താല്പര്യം ഖുർ ആൻ പാരായണം ചെയ്യരുതെന്നല്ല  മറിച്ച് പാരായണം കഴിഞ്ഞ ശേഷം സുന്നികൾ സാധാരണ ചെയ്യുന്നത് പോലെ ,,ഇതിന്റെ പ്രതിഫലം ഞാൻ ഉദ്ദേശിച്ച ആൾക്ക് എത്തിക്കണമേ,, എന്ന് പ്രാർത്ഥിക്കണമെന്ന് സൂചിപ്പിക്കലാണ് അല്ലെങ്കിൽ അഡ്രസ്സ് എഴുതാതെ കത്തയച്ചാൽ മേൽ വിലാസക്കാരനു കത്തു ലഭിക്കാത്തത് പോലെ ഇവനു പ്രതിഫലം ലഭിക്കില്ല.ഇതാണ് നവവി (റ) പറഞ്ഞത് ഇത് ഇങ്ങനെ തന്നെ വ്യാഖ്യാനിച്ചേ പറ്റൂ.കാരണം ഇത് പറഞ്ഞ നവവി (റ) മയ്യിത്തിനു ഖുർ ആൻ ഓതരുതെന്ന് വാദിക്കുന്ന വ്യക്തിയല്ല.മറിച്ച് തന്റെ ഗ്രന്ഥങ്ങളിലെല്ലാം ഖുർ ആൻ ഓതണമെന്ന് ഉദ്ബോധിപ്പിച്ച വ്യക്തിയാണ്.ഒരു ഉദാഹരണം മാത്രം പറയാം.തന്റെ പ്രസിദ്ധ ഗ്രന്ഥമായ ശർഹുൽ മുഹദ്ദബിൽ മഹാൻ പറയുന്നു,,

ويستحب أن يقرأ عنده شيء من القرأن وان ختموا القرأن كان أفضل(شرح المهذب 5 185)

മയ്യിത്തിന്റെ സമീപത്ത് വെച്ച് ഖുർ ആനിൽ നിന്ന് അല്പം പാരായണം ചെയ്യൽ സുന്നത്താക്കപ്പെടും ഖുർ ആൻ മുഴുവൻ ഓതിയാൽ അത് വളരെ ശ്രേഷ്ഠം തന്നെ(ശർഹുൽ മുഹദ്ദബ് 5/185)

ഖബ് ർ സന്ദർശന സമയത്തെ മര്യാദകൾ പറയുന്നിടത്ത് നവവി (റ) തന്നെ പറയുന്നു

ويستحب أن يقرأ من القرأن ما تيسر ويدعو لهم عقبها نص عليه الشافعي واتفق عليه الأصحاب

(شرح المهذب 5  204)

ഖബ് ർ സന്ദർശന സമയത്ത് കഴിയുന്നത്ര ഖുർ ആൻ പാ‍രായണം ചെയ്യലും ഉടനെ ഖബ് റിലുള്ളവർക്ക് വേണ്ടി പ്രാർത്ഥിക്കലും സുന്നത്താണ്.ഇമാം ശാഫി ഈ(റ) ഇത് വ്യക്തമാക്കുകയും ശിഷ്യന്മാർ ഈ അഭിപ്രായത്തിൽ ഏകോപിക്കുകയും ചെയ്തിരിക്കുന്നു
(ശർഹുൽ മുഹദ്ദബ് 5/204)
 
ഇത്ര വ്യക്തമായി മരിച്ചിടത്തും ഖബ് റിന്റെ സമീപത്തും ഖുർ ആൻ പാരായണം ചെയ്യണമെന്ന് പറഞ്ഞിട്ടും ഒരു ഉദ്ധരണിയെ സന്ദർഭത്തിൽ നിന്ന് അടർത്തിയെടുത്ത് ശാഫി ഈ മദ് ഹബ് ഖുർ ആൻ പാരായണത്തിന് എതിരാണെന്ന് വരുത്തുന്നത് എത്ര മാത്രം പ്രതിഷേധാർഹമല്ല! അള്ളാഹു സത്യം സത്യമായി ഉൾക്കൊള്ളാനും ഒറ്റപ്പെട്ടു കഴിയുന്ന പരേതർക്ക് ചെയ്തു കൊടുക്കാൻ നമുക്കാവുന്ന സഹായം ചെയ്തു കൊടുക്ക്‍ാനും സന്മനസ്സ് നൽകട്ടെ ആമീൻ 

40.  وَأَنَّ سَعْيَهُ سَوْفَ يُرَى

(40)തന്റെ പ്രവർത്തനം പിന്നീട് അവന് കാണിക്കപ്പെടുക തന്നെ ചെയ്യുമെന്നും

ഈ സൂക്തത്തിന്റെ വ്യാഖ്യാനത്തിൽ ഇമാം ത്വിബ് രി (റ) എഴുതുന്നു. “ഓരോരുത്തരും തന്റെ പ്രവർത്തനത്തിന്റെ പ്രതിഫലം അന്ത്യ നാളിൽ കാണുക തന്നെ ചെയ്യും നന്മക്ക് നന്മയും തിന്മക്ക് തിന്മയും എന്ന നിലക്ക് .ഒരു തെറ്റിന്റെ പേരിലും അത് ചെയ്തവൻ മാത്രമേ ശിക്ഷയനുഭവിക്കേണ്ടി വരികയുള്ളൂ .നന്മയുടെ പ്രതിഫലമാവട്ടെ അത് ചെയ്തവന്നു തന്നെയാണ് നൽകപ്പെടുക.തന്റെ കുറ്റം വേറെ ഒരാൾ ഏറ്റെടുക്കാം എന്ന വ്യവസ്ഥയിൽ ഇസ് ലാമിൽ നിന്നു പുറത്ത് പോയവനെയാണിവിടെ ഉദ്ദേശിക്കുന്നത്.അവന്റെ ജാമ്യം കൊണ്ട് ഒരു കാര്യവുമില്ലെന്നും തന്റെ ശിക്ഷ താൻ തന്നെ അനുഭവിക്കേണ്ടി വരുമെന്നും (കുറ്റം ചെയ്തവനാണല്ലോ ശിക്ഷ അനുഭവിക്കേണ്ടത്) വ്യക്തമാക്കുകയാണിവിടെ” (ഥിബ് രി  27/86)

41. ثُمَّ يُجْزَاهُ الْجَزَاء الْأَوْفَى

(41)പിന്നീട് അവന് അതിന്റെ പ്രതിഫലം പരിപൂർണ്ണമായി  നൽകപ്പെടുമെന്നും

ഈ സൂക്തങ്ങളുടെ അവതരണ പശ്ചാത്തലം നാം നേരത്തേ പറഞ്ഞു.എന്നാൽ അവതരണ ഹേതു എന്ത് തന്നെയായാലും സത്യത്തിൽ നിന്ന് പിൻ മാറുകയും കൊടുത്ത് തീർക്കുകയോ ചെയ്ത് തീർക്കുകയോ ചെയ്യേണ്ട ബാധ്യതകൾ മുഴുവൻ നിറവേറ്റാതെ കുറേ ഭാഗം വിട്ടു കളയുകയും  ചെയ്യുന്നവരെല്ലാം ഇതിൽ ഉൾപ്പെടുന്നുണ്ട്.സത്യം നിഷേധിക്കുകയും ബാധ്യതകൾ നിറവേറ്റാതിരിക്കുകയും ചെയ്യുന്നവർ തങ്ങളുടെ കുറ്റങ്ങൾ മറ്റു വല്ലവരും ഏറ്റെടുക്കുമെന്ന് വിശ്വസിക്കുന്നുണ്ടെങ്കിൽ  ആ അറിവ് അവർക്ക് എവിടെ നിന്ന് കിട്ടി? അദൃശ്യമായ വല്ല അറിവും ലഭിച്ചിട്ട് അത് മൂലമാണോ ഇത് അവർ മനസ്സിലാക്കിയത്? അതുണ്ടാവാൻ നിവൃത്തിയില്ല കാരണം ഖുർആനിലും പൂർവ്വ വേദങ്ങളിലുമൊന്നും അങ്ങനെയില്ല. അവയിലുള്ളത് നേരേ മറിച്ചാണ് ഏതൊരാളും മറ്റൊരാളുടെ കുറ്റം ഏറ്റെടുക്കില്ല എന്നാണ് വാക്യം മുപ്പത്തിഎട്ടിൽ പറയുന്നത് മഹ് ശറിൽ വെച്ച് മനുഷ്യനു തന്റെ കർമ്മങ്ങൾ കാണിച്ച് കൊടുത്ത് അവനെ ബോധ്യപ്പെടുത്തുകയും പിന്നീട് അതിന്റെ പ്രതിഫലം പൂർണ്ണമായി നൽകപ്പെടുകയും ചെയ്യും അതാണ് 40,41,വാക്യങ്ങളിൽ വ്യക്തമാക്കുന്നത്

42. وَأَنَّ إِلَى رَبِّكَ الْمُنتَهَى

(42) താങ്കളുടെ രക്ഷിതാവിങ്കലേക്ക് തന്നെയാണ് എല്ലാം ചെന്നെത്തുന്നത് എന്നും

എല്ലാ കാര്യങ്ങളുടെയും എല്ലാ ആളുകളുടെയും മടക്കം അള്ളാഹുവിലേക്ക് തന്നെയാണ്.എന്നിട്ട് എല്ലാവർക്കും –നല്ലവർക്ക് അതിനനുസരിച്ചും ചീത്ത ചെയ്തവർക്കു അതിനനുസരിച്ചും—അവൻ തന്നെയാണ് പ്രതിഫലം കൊടുക്കുക

43. وَأَنَّهُ هُوَ أَضْحَكَ وَأَبْكَى

(43)അവൻ തന്നെയാണ് ചിരിപ്പിക്കുകയും കരയിപ്പിക്കുകയും ചെയ്യുന്നത് എന്നും

എല്ലാം അവന്റെ അധികാരത്തിലും നിയന്ത്രണത്തിലും തന്നെയാണ്.ചിരിപ്പിക്കുന്നതും കരയിപ്പിക്കുന്നതും അതിനുള്ളകാരണങ്ങൾ നിയന്ത്രിക്കുന്നതും അവൻ തന്നെ ഇമാം ഥിബ് രി (റ) എഴുതുന്നു “സ്വർഗ്ഗത്തിൽ പ്രവേശിപ്പിച്ചു കൊണ്ട് സ്വർഗ്ഗക്കാരെ ചിരിപ്പിക്കുന്നതും നരകത്തിൽ കടത്തി നരകാവകാശികളെ കരയിക്കുന്നതും ഭൂമിയിൽ അവനുദ്ദേശിക്കുന്നവരെ ചിരിപ്പിക്കുന്നതും ഉദ്ദേശിക്കുന്നവരെ കരയിപ്പിക്കുന്നതും അവൻ തന്നെ” (ഥിബ് രി 27/87)

44.وَأَنَّهُ هُوَ أَمَاتَ وَأَحْيَا

(44) അവൻ തന്നെയാണ് മരിപ്പിക്കുകയും ജീവിപ്പിക്കുകയും ചെയ്യുന്നത് എന്നും

മരണവും ജീവിതവും അവൻ ഉണ്ടാക്കുന്നതാണ് ഇന്ദ്രിയത്തുള്ളിക്ക് ജീവിതത്തിലേക്ക് പുരോഗതി നൽകുന്നതാണ് ജീവിപ്പിക്കുക എന്നതിന്റെ താല്പര്യം

45. وَأَنَّهُ خَلَقَ الزَّوْجَيْنِ الذَّكَرَ وَالْأُنثَى

(45) അവൻ തന്നെയാണ് ആണ്,പെണ്ണ്‌ എന്നീ രണ്ടിണകളെ  സൃഷ്ടിച്ചതെന്നും

ആൺ പെൺ എന്നിങ്ങനെ ഭിന്ന ലിംഗക്കാരെ സൃഷ്ടിച്ച് ഒരാളെ മറ്റൊരാൾക്ക് ഇണയാക്കി നൽകുക എന്ന അനുഗ്രഹം അള്ളാഹു ചെയ്തത് തന്നെ

46.مِن نُّطْفَةٍ إِذَا تُمْنَى

(46)ഒരു ഇന്ദ്രിയ ബിന്ദുവിൽ നിന്ന്‌ അത് (ഗർഭാശയത്തിൽ) സ്രവിക്കപ്പെടുമ്പോൾ

ഗർഭാശയത്തിൽ സ്രവിക്കപ്പെടുന്ന നിസ്സാരമായ ഒരു ഇന്ദ്രിയത്തുള്ളിയാൽ അത്ഭുതകരമായ മനുഷ്യനെ പുരുഷൻ സ്ത്രീ എന്നിങ്ങനെ ഇണകളായി സൃഷ്ടിച്ചതും അവൻ തന്നെ

47. وَأَنَّ عَلَيْهِ النَّشْأَةَ الْأُخْرَى

(47)അവന്റെ മേൽ തന്നെയാണ് മറ്റേ സൃഷ്ടിക്കലും (പുനർജീവിപ്പിക്കലും) എന്നും

ഇങ്ങനെ സൃഷ്ടിച്ച അള്ളാഹുവിന് മരണ ശേഷം നിങ്ങളെ പുനർജ്ജനിപ്പിക്കുന്നതും പ്രയാസമില്ല.ഈ ഇണകൾ മരിച്ച് മണ്ണടിഞ്ഞ ശേഷം പുതിയ ഒരു സൃഷ്ടിയായി അവനെ പുനർജ്ജനിപ്പിക്കുന്ന കാര്യം അള്ളാഹു ഏറ്റെടുത്തിരിക്കുന്നു

48. وَأَنَّهُ هُوَ أَغْنَى وَأَقْنَى

(48)അവൻ തന്നെയാണ് (മനുഷ്യനെ) ധനികനാക്കിയതും (ധനത്തിന്റെ) സൂക്ഷിപ്പുകാരനാക്കിയതും എന്നും

ചിലർക്ക് സാമ്പത്തിക ശേഷി നൽകി പരാശ്രയ ജീവിതത്തിൽ നിന്ന് രക്ഷപ്പെടുത്തിയതും ആ സമ്പത്ത് നശിപ്പിച്ച് കളയാതെ സൂക്ഷിച്ച് വെക്കുവാനുള്ള പ്രാപ്തി നൽകിയതും അവൻ തന്നെ.

അള്ളാഹു അവനു ധനം നൽകുകയും അവൻ സംതൃപ്തനാവുകയും ചെയ്തു എന്നും അവനെ തൃപ്തിപ്പെടുത്തി എന്നും. അവനു ധനം നൽകിയ അള്ളാഹു മറ്റു പലരെയും അവനെ ആശ്രയിക്കുന്നവനാക്കി എന്നും അള്ളാഹു ഉദ്ദേശിച്ചവരെ ധനികരും അവൻ ഉദ്ദേശിച്ചവരെ ദരിദ്രരും ആക്കി എന്നും ഇവിടെ വിവിധ വ്യാഖ്യാനങ്ങളുണ്ട് (ഥിബ് രി 27/88)

49. وَأَنَّهُ هُوَ رَبُّ الشِّعْرَى

(49)അവൻ തന്നെയാണ് ശിഅ് റാ നക്ഷത്രത്തിന്റെ രക്ഷിതാവ് എന്നും

നല്ല തിളക്കമുള്ള ഒരു നക്ഷത്രമാണ് ശിഅ് റാ എന്നത്.പണ്ട് കാലത്ത് ചില അറബികൾ അതിനെ ആരാധിച്ചു വന്നിരുന്നത് കൊണ്ടാണ് അതിനെ പ്രത്യേകം എടുത്തു പറഞ്ഞത് അജ്ഞാത കാലത്ത് ആരാധിക്കപ്പെട്ട ഈ നക്ഷത്രത്തിന്റെ നാഥൻ അള്ളാഹുവാണെന്ന് പറഞ്ഞതിന്റെ താല്പര്യം ഈ നക്ഷത്രത്തെ ആരാധിക്കുകയും അതിന്റെ ഉടമസ്ഥനെ വിസ്മരിക്കുകയും ചെയ്യുന്ന നിലപാട് ഒഴിവാക്കി യഥാർത്ഥ ആരാധ്യനായ അള്ളാഹുവിനെ ആരാധിക്കുവാനുള്ള ഉപദേശമാണിതിൽ അടങ്ങിയിട്ടുള്ളത് (ഥിബ് രി)

50. وَأَنَّهُ أَهْلَكَ عَادًا الْأُولَى

(50)അവൻ തന്നെയാണ് ആദ്യ സമുദായമായ ആദിനെ നശിപ്പിച്ചതെന്നും

ഹൂദ് നബി (അ) യുടെ ജനതയാണ് ‘ആദ് സമൂഹം’ ഇറമിന്റെ മകൻ ആദിന്റെ സന്താന പരമ്പരയാണത്. ശക്തന്മാരും ധിക്കാരികളുമായിരുന്ന അവർ പ്രവാചകാദ്ധ്യാപനങ്ങൾക്ക് നേരേ പുറം തിരിഞ്ഞു നിൽക്കുകയും സത്യത്തെ വെല്ലു വിളിക്കുകയും താക്കീതുകളെ നിരന്തരം അവഗണിക്കുകയും ചെയ്തപ്പോൾ അവരെ അള്ളാഹു ശിക്ഷിച്ചു ഖുർആൻ പറയുന്നു .ആഞ്ഞു വീശുന്ന അത്യുഗ്രമായ കാറ്റു കൊണ്ടാണ് അവർ നശിപ്പിക്കപ്പെട്ടത് തുടർച്ചയായ എഴു രാത്രിയും എട്ട് പകലും കാറ്റിനെ അവരുടെ നേർക്ക് അള്ളാഹു തിരിച്ചു വിട്ടു.അപ്പോൽ കടപുഴകി വീണ ഈത്തപ്പന തടികൾ കണക്കെ ആ കാറ്റിൽ ജനം വീണു കിടക്കുന്നതായി അങ്ങേക്ക് കാണാം

സൂറത്തുൽ ഹാഖ:യുടെ ആറ്‌,ഏഴ് വാക്യങ്ങളിൽ അള്ളാഹു ഇങ്ങനെ അത് വിശദീകരിച്ചിട്ടുണ്ട്

51. وَثَمُودَ فَمَا أَبْقَى

(51)സമൂദ് സമുദായത്തെയും.എന്നിട്ട് (അവരിൽ നിന്ന് ആരെയും) അവൻ ബാക്കിയാക്കിയില്ല

സ്വാലിഹ് നബിയുടെ ജനതയാണ് സമൂദ് പാറകൾ തുരന്ന് അതിന്റെ അകത്ത് മനുഷ്യനു താമസിക്കാനായി സൌകര്യം ഒരുക്കിയ ബുദ്ധി രാക്ഷസന്മാർ.പക്ഷെ സാലിഹ് നബി (അ) എന്ന പ്രവാചകന്റെ കല്പനകൾക്കെതിരിൽ നില കൊള്ളുകയും കുറ്റങ്ങൾ ആവർത്തിക്കുകയും ചെയ്തപ്പോൾ ശക്തമായ ഒരു ശബ്ദം മുഖേന അള്ളാഹു അവരെ നശിപ്പിച്ചു

52. وَقَوْمَ نُوحٍ مِّن قَبْلُ إِنَّهُمْ كَانُوا هُمْ أَظْلَمَ وَأَطْغَى

(52) അതിന്റെ മുമ്പ് നൂഹി (അ)ന്റെ ജനതയെയും (അവൻ നശിപ്പിച്ചിട്ടുണ്ട്) അവർ ഏറ്റവും അക്രമം ചെയ്തവരും ഏറ്റവും ധിക്കാരം പ്രവർത്തിച്ചവരും തന്നെയായിരുന്നു

എല്ലാ പ്രവാചക വിരോധികളും അക്രമികളാണെങ്കിലും പിന്നീട് വന്ന എല്ലാ ധിക്കാരികളേക്കാൾ അതിക്രമികളായിരുന്നു ഇവർ.നൂഹ നബി (അ) തൊള്ളായിരത്തി അമ്പത് കൊല്ലം രാപ്പകൽ ഭേധമില്ലാതെ തന്റെ  ജനതയെ സത്യത്തിലേക്ക് ക്ഷണിച്ചു എന്നാൽ ജനം അനുകൂലമായി പ്രതികരിച്ചില്ലെന്ന് മാത്രമല്ല ശക്തമായ പരിഹാസവും അക്രമവും കൊണ്ട് നൂഹ് നബി (അ) യെ കഷ്ടപ്പെടുത്തുകയായിരുന്നു അവർ.നൂഹ് നബി (അ) യെ അവർ പലപ്പോഴും അടിച്ചു ബോധം കെടുത്തുമായിരുന്നു പക്ഷെ ബോധം തിരിച്ചു കിട്ടുമ്പോൾ വിവരമില്ലാത്ത ഈ ജനതയോട് നീ പൊറുക്കേണമേ നാഥാ എന്ന് പ്രാർത്ഥിക്കുകയായിരുന്നു മഹാൻ ചെയ്തിരുന്നത്.പക്ഷെ നൂഹ് നബി (അ) യുടെ പ്രബോധനം കേൾക്കാൻ പോലും സന്മനസ്സില്ലാത്ത അവസ്ഥയിലേക്ക് അവർ അഥ:പതിക്കുകയും അവർ നന്നാവുമെന്ന പ്രതീക്ഷയുടെ അവസാന കണികയും നഷ്ടപ്പെടുകയും ചെയ്തപ്പോൾ അവർക്കെതിരെ നൂഹ് നബി (അ) പ്രാർത്ഥിക്കുകയും അള്ളാഹു അവരെ ശിക്ഷിക്കുകയും ചെയ്തു.ഥൂഫാൻ ജല പ്രളയം മുഖേന മുക്കിക്കൊല്ലപ്പെടുകയായിരുന്നു ആ ധിക്കാരികൾ.

53. وَالْمُؤْتَفِكَةَ أَهْوَى

(53) കീഴ്മേലായി മറിഞ്ഞു കിടക്കുന്ന ആ രാജ്യത്തെ അവൻ വീഴ്ത്തി 

ലൂഥ് നബി (അ) യുടെ ജനതയുടെ നാടായ സദൂം ആണ് ഇവിടെ പറഞ്ഞത് മുമ്പൊന്നും കാണാത്ത ഒരു ദുഷ് പ്രവൃത്തിയുടെ വക്താക്കളായിരുന്നു അവർ.സ്വവർഗ്ഗ രതിയിലായിരുന്നു അവർ മുഴുകിയിരുന്നത്.അതിനെതിരിൽ പ്രകൃതി വിരുദ്ധ നിലപാടുകൾ നിർമ്മാർജ്ജനം ചെയ്യാൻ അള്ളാഹു ലൂഥ് നബി (അ) യെ അങ്ങോട്ട് നിയോഗിച്ചു പക്ഷെ ലൂഥ് നബി (അ) യുടെ സദുപദേശം ഉൾക്കൊള്ളുന്നതിനു പകരം നിഷേധത്തിന്റെ ആൾ രൂപങ്ങളാവാനും ധിക്കാരത്തിന്റെ കൊടുമുടിയിൽ കയറി നിന്ന് പ്രവാചകനെ വെല്ലു വിളിക്കാനുമായിരുന്നു അവർ ശ്രമിച്ചത് അപ്പോൾ അള്ളാഹു അവരെ നശിപ്പിച്ചു.നശിപ്പിച്ച രൂപമാണ് കീഴ്മേൽ മറിക്കൽ.

അള്ളാഹുവിന്റെ നിർദ്ദേശപ്രകാരം ഏഴാം ഭൂമിയുടെ അടി മുതൽ പുഴക്കി എടുത്ത് ആകാശത്തേക്ക് ഉയർത്തുകയും ഭൂമിയിലേക്ക് മറിച്ചിടുകയും ചെയ്തു.ഇതാണ് ഒരു വ്യാഖ്യാനം. സത്യത്തെ കളവാക്കിയവരെ അള്ളാഹു നശിപ്പിച്ചു എന്നും ഇവിടെ വ്യാഖ്യാനമുണ്ട്

(ഥിബ് രി 27/91)

54.فَغَشَّاهَا مَا غَشَّى

(54)എന്നിട്ട് അതിനെ ആവരണം ചെയ്തതെല്ലാം ആവരണം ചെയ്തു

ആ നാട്ടുകാരുടെ മേൽ കല്ലു മഴ വർഷിച്ചതിനെ സൂചിപ്പിച്ചതാണ് ആവരണം എന്ന് പറഞ്ഞത്.മറിച്ചിടപ്പെട്ട ആഗ്രാമക്കാരുടെ മേൽ പ്രത്യേകം അടയാളപ്പെടുത്തപ്പെട്ട കല്ലുകൾ വർഷിച്ചു.ഓരോരുത്തരുടെയും പേരുകൾ പ്രത്യേകം രേഖപ്പെടുത്തിയ ശക്തമായ തീയിൽ ചുട്ടെടുക്കപ്പെട്ട കല്ലുകളായിരുന്നു അത്.ആ കല്ലുകൾ ഓരോരുത്തരെയും നശിപ്പിക്കാൻ പോന്നവയായിരുന്നു (ഥിബ് രി 27/92) 

55. فَبِأَيِّ آلَاء رَبِّكَ تَتَمَارَى

(55)എന്നിരിക്കെ (മനുഷ്യാ) നിന്റെ രക്ഷിതാവിന്റെ അനുഗ്രഹങ്ങളിൽ ഏതൊന്നിനെക്കുറിച്ചാണ് നീ സംശയിക്കുന്നത്?

മനുഷ്യൻ പ്രത്യക്ഷത്തിൽ അനുഭവിച്ചു കൊണ്ടിരിക്കുന്നതും ചിന്തിച്ചാൽ മനസ്സിലാക്കാൻ കഴിയുന്നതുമായ പല കാര്യങ്ങളും നിരത്തിക്കാട്ടിയ ശേഷം തന്റെ അനുഗ്രഹങ്ങളിൽ സംശയം വെച്ച് പോരുന്ന മനുഷ്യനോട് അള്ളാഹു ചോദിക്കുന്നതിതാണ് നിന്റെ റബ്ബിന്റെ ഏത് അനുഗ്രഹത്തെക്കുറിച്ചാണ് നീ സംശയിക്കുന്നത്? എന്തൊരു ഗാംഭീര്യമുള്ള ചോദ്യം! മേൽ വിവരിച്ച കാര്യങ്ങൾ മുന്നിൽ വെച്ച് കൊണ്ട് ഈ ചോദ്യത്തിന്റെ ഗൌരവം ഒന്നാലോചിക്കുക.നബിമാരെ ധിക്കരിച്ചവരും സത്യത്തെ അവഗണിച്ചവരും ദു:ഖിക്കേണ്ടി വരും അതിനാൽ ഓർക്കുക നിഷേധത്തിന്റെ ശൈലി വെടിഞ്ഞ് അനുസരണത്തിന്റെ സ്വഭാവം സ്വീകരിക്കുകയും നാഥന്റെ അനുഗ്രഹത്തിനു യോഗ്യത നേടുകയും ചെയ്യുക ഇതാണിവിടെ നാം ഉൾക്കൊള്ളേണ്ട പാഠം

നബി(സ)യുടെ ഉന്നത നിലപാടും അവിടുത്തേക്ക് സന്ദേശം ലഭിക്കുന്ന മാർഗവും വിവരിച്ച ശേഷം അവിടുത്തെപ്പറ്റിയാണ് താഴെ വിവരിക്കുന്നത്

56.هَذَا نَذِيرٌ مِّنَ النُّذُرِ الْأُولَى

 (56)ഇവർ (നബി -സ) പൂർവീകരായ താക്കീതുകാരിൽ പെട്ട  ഒരു താക്കീതുകാരനാകുന്നു

മനുഷ്യ സമൂഹത്തിന്റെ ആരംഭം മുതലേ പല താക്കീതുകാരും (പ്രവാചകരും) വന്ന് പോയിട്ടുണ്ട് നബി(സ) ആ കൂട്ടത്തിന്റെ ഭാഗമാണ്.ആ രംഗത്ത് പുതിയതായി പ്രത്യക്ഷപ്പെട്ട ഒരാളല്ല എന്നാൽ അവിടുന്ന് അവസാനത്തെ പ്രവാചകരാണ് ഇനി പ്രവാചകൻ വരാനില്ല

ഞാൻ നിങ്ങളോട് നൽകുന്ന താക്കീതുകളെല്ലാം മുൻ വേദങ്ങളിലും നൽകപ്പെട്ടിട്ടുള്ള താക്കീതുകളാണെന്നും ഇവിടെ വ്യാഖ്യാനമുണ്ട്

57. أَزِفَتْ الْآزِفَةُ

(57)ആസന്നമായ  ആ സംഭവം  (ഇതാ) അടുത്തു കഴിഞ്ഞു

ലോകാവസാനം അടുത്തു കഴിഞ്ഞു ഈ ലോകത്തിന് ഇനി കൂടുതൽ ആയുസ്സില്ല അതിനായി ഒരുങ്ങുകയും തിന്മകളിൽ നിന്ന് ഒഴിവാകുകയും ചെയ്യുക. ഇമാം ഇബ്നു കസീർ (റ) എഴുതുന്നു

“സഹ് ലുബ്നു സഅ്ദ് (റ) വിൽ നിന്ന് ഇമാം അഹ് മദ് (റ) ഉദ്ധരിക്കുന്നു. “നബി(സ) പറഞ്ഞു.നിങ്ങൾ നിസ്സാരമായി കാണുന്ന ദോഷങ്ങളെ നിങ്ങൾ സൂക്ഷിക്കണം കാരണം നിസ്സാരമായി കാണുന്ന ദോഷങ്ങളുടെ ഉപമ ഒരു താഴ്വരയിൽ ഇറങ്ങിയ ഒരു കൂട്ടം ജനങ്ങളുടെ ഉപമയാണ്.അവരിൽ ഓരോരുത്തരും മരത്തിന്റെ ചെറിയ ഓരോ ചുള്ളികൾ കൊണ്ട് വന്നു അവ ഉപയോഗിച്ച് അവർക്കാവശ്യമായ റൊട്ടി അവർ ചുട്ടെടുത്തു. ഇത് പോലെ നിസ്സാരമായിക്കാണുന്ന ദോഷങ്ങൾ ധാരാളമായി ചെയ്താൽ വിചാരണ സമയത്ത് ഒരാൾ നശിക്കാൻ അത് മതിയാവും (ഇബ്നു കസീർ 4/378) ഈ ഹദീസിന്റെ താല്പര്യം ഇതാണ്.നിസ്സാരമായി നാം കാണുന്ന തിന്മകൾ ധാരാളം ഒരുമിച്ചു കൂടുമ്പോൾ നമ്മെ പരലോകത്ത് നരകത്തിലെത്തിക്കാൻ അത് കാരണമാവും.ഒരാൾ മരത്തിന്റെ ചെറിയ ഒരു ചുള്ളി കൊണ്ട് വന്നാൽ അത് കൊണ്ട് മാത്രം ഒന്നും ചെയ്യാൻ കഴിയില്ല പക്ഷെ അങ്ങനെയുള്ള കുറേ ചുള്ളികളുണ്ടായാൽ ഭക്ഷണം പാകം ചെയ്യാൻ അത് മതിയാവുമല്ലോ.നിസ്സാരമല്ലേ എന്ന് കരുതി ചെയ്യുന്ന തെറ്റുകൾ ഒരുമിച്ച് കൂടുമ്പോൾ  അത് വലിയ അപകടമാവും (പല തുള്ളി പെരുവെള്ളം എന്ന് പറയാറില്ലെ നാം അത് പോലെ! )

58. لَيْسَ لَهَا مِن دُونِ اللَّهِ كَاشِفَةٌ

(58)അള്ളാഹുവിനു പുറമെ അതിനെ തട്ടിയകറ്റുന്ന  ഒരു ശക്തിയുമില്ല

ലോകാവസാനം വരുമ്പോൾ അതിനെ തട്ടി മാറ്റാനോ തടഞ്ഞു നിറുത്തുവാനോ ഒരു ശക്തിയുമുണ്ടാവില്ല. അത് എപ്പോൾ സംഭവിക്കുമെന്ന് വെളിപ്പെടുത്താൻ അള്ളാഹുവിനല്ലാതെ സാദ്ധ്യമല്ല എന്നും വ്യാഖ്യാനമുണ്ട്

     أَفَمِنْ هَذَا الْحَدِيثِ تَعْجَبُونَ 59

 (59) എന്നിരിക്കെ ഈ വാർത്തയെ (ഖുർ ആനെ) ക്കുറിച്ചാണോ നിങ്ങൾ അത്ഭുതപ്പെടുന്നത്

വസ്തുത ഇതായിരിക്കെ ഈ ഖുർ ആൻ കേട്ട സമയത്ത് അതിൽ വിശ്വസിക്കുന്നതിനു പകരം അതിനെ നിഷേധിക്കുകയും പരിഹസിക്കുകയുമാണോ ചെയ്യുന്നത്? നബി  (സ) ക്ക് ഈ ഖുർ ആൻ അവതരിപ്പിക്കപ്പെട്ടതിന്റെ പേരിൽ നിങ്ങൾ ആശ്ചര്യപ്പെടുകയാണോ  ഖുർ ആനിലുള്ളത് സത്യമല്ലെന്ന സന്ദേഹം നിങ്ങൾക്കുണ്ടോ എന്നെല്ലാം ഈ ചോദ്യത്തിൽ അടങ്ങിയിട്ടുണ്ട്

 60.وَتَضْحَكُونَ وَلَا تَبْكُونَ

(60)നിങ്ങൾ ചിരിക്കുകയും കരയാതിരിക്കുകയും ചെയ്യുന്നതും?

പരിഹസിച്ച് ചിരിക്കുന്നതിനു പകരം നിങ്ങൾ ചെയ്യേണ്ടിയിരുന്നത് ഇതിന്റെ ഗൌരവം ആലോജിച്ച് കരയുകയായിരുന്നു ഖുർ ആനിൽ അടങ്ങിയിട്ടുള്ള ഗൌരവതരമായ പാഠങ്ങളും ധിക്കാരികൾക്കുള്ള താക്കീതുകളും നിഷേധികൾ അനുഭവിച്ച ശിക്ഷകളുമൊക്കെ ഓർത്ത് കരയുകയും അത്തരമൊരു അപകടത്തിൽ നിന്ന് രക്ഷപ്പെടാനും ശാശ്വത വിജയം കരസ്ഥമാക്കാനുമായി ഖുർആനികാദ്ധ്യാപനങ്ങളെ സ്വീകരിക്കുകയുമല്ലേ ചിന്താ ശേഷിയുള്ളവൻ ചെയ്യേണ്ടത്.അതിനു പകരം ഇതിനെ അപഹസിക്കുകയും തള്ളിക്കളയുകയും ചെയ്യുന്നത് എന്തു മാത്രം ധിക്കാരമാണ്!

 61.وَأَنتُمْ سَامِدُونَ

(61) നിങ്ങളാവട്ടെ അശ്രദ്ധ കാട്ടുന്നവരും വിനോദം കൊള്ളുന്നവരുമാകുന്നു

നിങ്ങൾ ഐഹിക ജീവിതത്തിന്റെ സുഖത്തിൽ ലയിക്കുകയും വരാനിരിക്കുന്ന അപകടങ്ങൾ അവഗണിക്കുകയും ചെയ്യുന്നുവല്ലോ!

 62.فَاسْجُدُوا لِلَّهِ وَاعْبُدُوا

(62) അത് കൊണ്ട് നിങ്ങൾ അള്ളാഹുവിനു സുജൂദ് ചെയ്യുകയും അവനെ ആരാധിക്കുകയും ചെയ്തു കൊള്ളുക

ചിന്താ ശേഷിയുള്ള മനുഷ്യന്റെ കടമ  ഈ ഗൌരവതരമായ വിഷയം ഉൾക്കൊള്ളുകയും അള്ളാഹുവിന്റെ വിനീത ദാസനായി അവനെ ആരാധിക്കുകയും അവനു സാഷ്ടാംഗം ചെയ്യുകയുമാണ്. അള്ളാഹുവിനു മാത്രമാണ് നിങ്ങൾ സുജൂദ് ചെയ്യേണ്ടത് മറ്റു ദൈവങ്ങളെ സ്ഥാപിക്കുന്നതും അവകളെ ആരാധിക്കുന്നതും ശരിയല്ല തന്നെ.  (ഈ വാക്യം ഓതിയാൽ ഓത്തിന്റെ സുജൂദ് സുന്നത്തുണ്ട്. )

ഇബ്നു അബ്ബാസ് (റ) പറയുന്നു,നബി(സ) ഈ അദ്ധ്യായം പാരായണം ചെയ്തപ്പോൾ സുജൂദ് ചെയ്തു.അവിടെയുണ്ടായിരുന്ന മുസ് ലിംകളും മുശ് രിക്കുകളും ജിന്നും നബി(സ)യോടൊപ്പം സുജൂദ് ചെയ്തതായി ഇമാം ബുഖാരി ഉദ്ധരിഛ്സിട്ടുണ്ട് (ഇബ്നു കസീർ  4/379)
അള്ളാഹുവിന്റെ താക്കീതുകൾ മനസ്സിലാക്കി രണ്ടു ലോക രക്ഷയും സാദ്ധ്യമാവും വിധം ജീവിതത്തെ ക്രമീകരിക്കാൻ അള്ളാഹു നമ്മെയെല്ലാം അനുഗ്രഹിക്കട്ടെ ആമീൻ

ഈ അദ്ധ്യായം പാരായണം ചെയ്താൽ മക്കയിൽ നബി(സ)യെ അംഗീകരിച്ചവരുടെയും നിഷേധിച്ചവരുടെയും എണ്ണമനുസരിച്ച് പത്ത് നന്മകൾ അള്ളാഹു അവനു നൽകും (ബൈളാവി 2/444)http://sunnisonkal.blogspot.com